ព័ត៌មានអន្ដរជាតិ

EU គ្រោងបោះឆ្នោតសម្រេចការបន្ថែមពន្ធលើ EV ចិន នៅចុងខែនេះ

បានផុស

៧ ខែ មុន

នៅ

ថ្ងៃសៅរ៍ ១៤ កញ្ញា ២០២៤

ដោយ

ទីភ្នាក់ងារព័ត៌មាន Bloomberg បានរាយការណ៍កាលពីថ្ងៃសុក្រថា សហភាពអឺរ៉ុបមានបំណងរៀបចំការបោះឆ្នោត ដើម្បីសម្រេចលើវិធានការបន្ថែមពន្ធលើរថយន្តអគ្គិសនី (EV) នាំចូលពីប្រទេសចិន នាថ្ងៃទី ២៥ ចុងខែកញ្ញា នេះ ដោយបដិសេធសំណើរជាច្រើនពីភាគីក្រុងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះមានន័យថា គណៈកម្មាការអឺរ៉ុបកំពុងខិតកាន់តែកៀកលើការសម្រេចសំណើរដាក់ពន្ធរហូតដល់ ៣៥,៣ ភាគរយ លើ EV ផលិតនៅចិន ដោយបន្ថែមពីលើពន្ធនាំចូលរថយន្តត្រឹមតែ ១០ ភាគរយ តាមស្ដង់ដារបច្ចុប្បន្នរបស់អឺរ៉ុប។

មុនការរាយការណ៍របស់ Bloomberg មួយថ្ងៃ សហភាពអឺរ៉ុបបានទទួលការផ្តល់ជូនពីក្រុមហ៊ុនផលិតរថយន្ត EV ក្នុងប្រទេសចិនផ្សេងៗ អំពីតម្លៃនាំចូលអប្បបរមាចូលទៅក្នុងប្លុក ដែលជាមធ្យោបាយរបស់ក្រុមហ៊ុនទាំងនោះដើម្បីជៀសវាងវិធានការពន្ធ ដែលជាបញ្ហាពាណិជ្ជកម្មដ៏តានតឹងរវាងចិន និងអឺរ៉ុប នាពេលបច្ចុប្បន្ន។ យ៉ាងណាមិញ ប្លុកអឺរ៉ុបបានច្រានចោលសំណើនោះ។

នាពេលកន្លងមក ភាគីចិនបានបន្ទន់ជំហរ ហើយសុំឱ្យមានការចរចាគ្នាលើបញ្ហានេះ ទាំងទទូចឱ្យសហភាពអឺរ៉ុប លុបចោលវិធានការ «ការពារនិយម» របស់ខ្លួន។ ប៉ុន្តែគ្មានការវិវត្តថយក្រោយជាដុំកំភួនពីប្លុកនៅឡើយទេ។

បើតាមទីភ្នាក់ងារសារព័ត៌មានរ៉យទ័រ ប្រធានពាណិជ្ជកម្មសហភាពអឺរ៉ុប លោក Valdis Dombrovskis នឹងជួបជាមួយរដ្ឋមន្ត្រីក្រសួងពាណិជ្ជកម្មចិនលោក Wang Wentao នៅថ្ងៃព្រហស្បតិ៍សប្តាហ៍ក្រោយ។

គួរគូសបញ្ជាក់ថា សំណើពន្ធចុងក្រោយនឹងត្រូវបោះឆ្នោតដោយសមាជិកទាំង ២៧ ប្រទេសរបស់សហភាពអឺរ៉ុប។ វាអាចនឹងត្រូវបានអនុវត្តនៅចុងខែតុលា ប្រសិនបើសមាជិកភាគច្រើនបោះឆ្នោតគាំទ្រវា៕