ព័ត៌មានអន្ដរជាតិ

តម្លៃប្រេងធ្លាក់ចុះជាថ្មី

បានផុស

៧ ខែ មុន

នៅ

ថ្ងៃសៅរ៍ ១៤ កញ្ញា ២០២៤

ដោយ

តម្លៃប្រេងបានធ្លាក់ចុះកាលពីថ្ងៃសុក្រ ដែលជាថ្ងៃបញ្ចប់ការជួញដូរប្រចាំសប្ដាហ៍ ខណៈផលិតកម្មប្រេងឆៅនៅឈូងសមុទ្រម៉ិកស៊ិករបស់សហរដ្ឋអាមេរិកបានបន្តដំណើរការឡើងវិញ ក្រោយព្យុះសង្ឃរា Francine បក់បោកផុត ហើយទិន្នន័យបង្ហាញពីឧបករណ៍ខួងអណ្ដូងប្រេងរបស់អាមេរិកកើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេងឆៅនាពេលអនាគត ម៉ាក Brent បានជួញដូរនៅតម្លៃ ៧១,៦១ ដុល្លារ/បារ៉ែល ដោយធ្លាក់ចុះ ៣៦ សេន ឬ ០,៥ ភាគរយ ខណៈប្រេងឆៅអាមេរិក ម៉ាក West Texas Intermediate (WTI) បានជួញដូរនៅតម្លៃ ៦៨,៦៥ ដុល្លារ/បារ៉ែល ដោយធ្លាក់ចុះ ៣២ សេន ឬ ០,៥ ភាគរយ។

វាគឺជាការធ្លាក់ចុះជាថ្មី បន្ទាប់ពីតម្លៃប្រេងទាំង២បានកើនមកវិញតិចតួច ក្រោយតម្លៃប្រេងម៉ាក Brent បានធ្លាក់ចុះក្រោយ ៧០ ដុល្លារ/បារ៉ែល ជាលើកដំបូងក្នុងរយៈពេលជិត៣ឆ្នាំ កាលពីថ្ងៃអង្គារ។

អ្នកជំនាញបានភ្ជាប់ការធ្លាក់ចុះជាថ្មីនេះ ទៅនឹងការដកការទិញនាចុងសប្ដាហ៍របស់វិនិយោគិន នៅពេលដែលផលិតកម្ម និងសកម្មភាពចម្រាញ់នៅតំបន់ឆ្នេរឈូងសមុទ្រអាមេរិកចាប់ផ្តើមឡើងវិញ ក្រោយព្យុះសង្ឃរា Francine បានបង្ខំឱ្យផលិតកម្មប្រេងក្នុងតំបន់ប្រមាណ ៤២ ភាគរយ បិទដំណើរការជាបណ្ដោះអាសន្ន។

ជុំវិញនិន្នាការធ្លាក់ចុះតម្លៃប្រេងនារយៈពេលប៉ុន្មានសប្ដាហ៍ចុងក្រោយនេះ អ្នកជំនាញបានលើកឡើងពីកម្សោយនៃតម្រូវការប្រេងទាំងនៅសហរដ្ឋអាមេរិក និងចិន ដែលជាប្រទេសប្រើប្រេងធំជាងគេបំផុត៕