ព័ត៌មានអន្ដរជាតិ

វៀតណាមនឹងកើបចំណូលបាន ៥ ប៊ីលានដុល្លារ ពីការនាំចេញអង្ករឆ្នាំនេះ

បានផុស

៥ ខែ មុន

នៅ

ថ្ងៃចន្ទ ១៦ កញ្ញា ២០២៤

ដោយ

ការនាំចេញអង្កររបស់វៀតណាម រំពឹងថានឹងឈានដល់ទំហំទឹកប្រាក់ប្រហែល ៥ ប៊ីលានដុល្លារនៅឆ្នាំនេះ ខណៈតម្រូវការខ្ពស់ពីទីផ្សារធំៗដែលតែងតែនាំចូលអង្កររបស់វៀតណាម ដូចជាហ្វីលីពីន និងឥណ្ឌូណេស៊ី នៅតែបន្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានវៀតណាម VNS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរំពឹងទុកពីកំណត់ត្រាថ្មីនេះ ធ្វើឡើងខណៈក្រសួងកសិកម្ម និងអភិវឌ្ឍន៍ជនបទវៀតណាម (MARD) បានឱ្យដឹងថា ក្នុងរយៈពេល ៨ ខែដំបូង ដើមឆ្នាំនេះ ប្រទេសបាននាំចេញអង្ករប្រមាណ ៦,១៦ លានតោន ដោយកើនឡើង ៥,៩ ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈកើបចំណូលបានជិត ៣,៨៥ ប៊ីលានដុល្លារ កើនឡើងប្រមាណ ២១,៧ ភាគរយ។

យោងតាម MARD ក្រៅតែពីកំណើននៃបរិមាណ និងតម្លៃនៃការនាំចេញសរុប តម្លៃអង្ករនាំចេញជាមធ្យមក្នុង១តោនៗ ក៏កើនឡើង ១៤,៨ ភាគរយ ផងដែរក្នុងរយៈពេល៨ខែដូចគ្នា ដោយលក់នៅតម្លៃ ៦២៥ ដុល្លារ/តោន។

MARD និយាយថា ការផ្គត់ផ្គង់របស់ប្រទេសនាំចេញអង្ករមួយចំនួន ត្រូវបានកម្រិតនាពេលបច្ចុប្បន្ននេះ ប៉ុន្តែតម្រូវការពីប្រទេសដែលជាអតិថិជនរបស់វៀតណាមនៅតែខ្ពស់។ លក្ខខណ្ឌអំណោយផលនេះ ធ្វើឱ្យបរិមាណ និងតម្លៃនាំចេញអង្ករវៀតណាមបានកើនឡើង ដោយសារគុណភាពអង្ករវៀតណាមមានភាពកាន់តែប្រសើរឡើង ដែលបំពេញតម្រូវការទីផ្សារពិភពលោក៕