ព័ត៌មានអន្ដរជាតិ

ថៃអាចខាតបង់សេដ្ឋកិច្ចរហូតដល់ជាង ៨០០ លានដុល្លារ ដោយសារតែទឹកជំនន់

បានផុស

៥ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

សហព័ន្ធឧស្សាហកម្មថៃ (FTI) បានអះអាងកាលពីថ្ងៃចន្ទថា ទឹកជំនន់នៅភាគខាងជើងប្រទេសថៃមានសភាពធ្ងន់ធ្ងរបំផុតក្នុងរយៈពេល ៨០ ឆ្នាំចុងក្រោយនេះ និងអាចបង្កការខាតបង់ផ្នែកសេដ្ឋកិច្ចរហូតដល់ដល់ ២៧ ប៊ីលានបាត (៨១១ លានដុល្លារ)។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសហព័ន្ធ លោក Kriengkrai Thiennukul បានថ្លែងថា៖ «យើងប៉ាន់ប្រមាណថា ទឹកជំនន់បានបណ្តាលឱ្យមានការខូចខាតពី ២៥-២៧ ប៊ីលានបាត ដល់សេដ្ឋកិច្ច និងសហគ្រិននៅក្នុងតំបន់»។ លោកបានចង្អុលទៅលើការបំផ្លិចបំផ្លាញនៃតំបន់កសិកម្ម និងចម្ការដំណាំហូបផ្លែ ដោយសារតែភ្លៀងធ្លាក់ខ្លាំងនៅថៃ និងមីយ៉ាន់ម៉ា ខណៈមានការព្យាករថានឹងមានភ្លៀងធ្លាក់ខ្លាំងជោគជាំមកលើប្រទេសថៃបន្ថែមទៀតនាសប្តាហ៍នេះ។

លោក Kriengkrai បានបន្តទៀតថា សមាជិក FTI ចំនួន ៦០ នៅខេត្តឈៀងរ៉ៃ បានរងផលប៉ះពាល់ដោយទឹកជំនន់ រួមទាំងការខូចខាតដល់រោងចក្រ ម៉ាស៊ីន រថយន្ត និងសម្ភារៈការិយាល័យ។ លោកបន្តថា ការិយាល័យ FTI នៅឈៀងរ៉ៃត្រូវបានបញ្ជាឱ្យវាយតម្លៃការខូចខាតដោយទឹកជំនន់ ដូច្នេះវិធានការដើម្បីទូទាត់សងការខូចខាតអាចត្រូវបានចាប់ផ្តើមនៅសប្តាហ៍នេះ។

មន្រ្តីថៃដដែលបន្ថែមថា សមាជិក FTI ដែលផលិតទំនិញប្រើប្រាស់ ទទួលបានការស្នើសុំឱ្យបង្កើនសមត្ថភាពផលិតកម្មរបស់ពួកគេ ដើម្បីបំពេញតម្រូវការរបស់ពលរដ្ឋចំពេលមានវិបត្តិទឹកជំនន់ ខណៈសមាជិកភាគច្រើនក្នុងខេត្តឈៀងរ៉ៃ ស្ថិតនៅក្នុងឧស្សាហកម្មកែច្នៃកសិកម្ម។

គួរគូសបញ្ជាក់ថា ប្រទេសថៃ ក៏ដូចជាប្រទេសក្នុងតំបន់ផ្សេងៗទៀតរួមមានឡាវ មីយ៉ាន់ម៉ា និងវៀតណាម កំពុងប្រឈមមុខដោយសារតែទឹកជំនន់ ដោយសារតែភ្លៀងធ្លាក់ខ្លាំងជោគជាំ ដែលកាន់តែដុនដាបដោយសារតែចំហាយព្យុះទីហ្វុងយ៉ាកជី។

កាលពីដើមឆ្នាំនេះ មន្រ្តីថៃធ្លាក់បានព្រមានរួចហើយ ឱ្យប្រទេសត្រៀមខ្លួនសម្រាប់ទឹកជំនន់ធ្ងន់ធ្ងរ។ បើតាមការចុះផ្សាយរបស់កាសែតបាងកកប៉ុស្តិ៍ ទឹកជំនន់កំពុងប៉ះពាល់ដល់ប្រជាពលរដ្ឋចំនួន ៣០ ០៧៣ គ្រួសារ ក្នុងខេត្តចំនួន ១២ របស់ថៃ ដែលភាគច្រើននៅភាគខាងជើងប្រទេស ខណៈផលប៉ះពាល់ក៏កំពុងកើនឡើងតាមបណ្ដាខេត្តផ្សេងៗទៀត ជាពិសេសនៅភាគឦសានកាលពីថ្ងៃអាទិត្យ ខណៈខាងឧត្តុនិយមបានរំពឹងថា នឹងមានភ្លៀងធ្លាក់ខ្លាំងបន្ថែមទៀតក្នុងសប្តាហ៍នេះ។

អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយថៃ លោក Chaiwat Chuntirapong បានឱ្យដឹងកាលពីថ្ងៃអាទិត្យថា ចាប់ពីពាក់កណ្ដាលខែសីហា ដល់ពាក់កណ្ដាលខែកញ្ញា ទឹកជំនន់បានសម្លាប់មនុស្ស ៤៣ នាក់ បង្ករបួស ២៤ នាក់ និងប៉ះពាល់ដល់ ១៣៣ ០៤០ គ្រួសារ នៅទូទាំងខេត្តចំនួន ២៨ ដែលមានពាក់កណ្ដាលនៅតំបន់ភាគខាងជើង៕