ព័ត៌មានអន្ដរជាតិ

វៀតណាមកត់ត្រាពីកំណើនឱនភាពពាណិជ្ជកម្មជាមួយចិន ដល់ជាង ៥០ ប៊ីលានដុល្លារ

បានផុស

៦ ខែ មុន

នៅ

ថ្ងៃពុធ ១៨ កញ្ញា ២០២៤

ដោយ

ស្ថិតិចុងក្រោយរបស់អគ្គនាយកដ្ឋានគយវៀតណាម បានបង្ហាញថា ពាណិជ្ជកម្មរវាងចិន និងវៀតណាម បានឈានដល់ជិត ១៣០,៨ ប៊ីលានដុល្លារ ក្នុងរយៈពេល៨ខែដំបូងនៃឆ្នាំនេះ ប៉ុន្តែចិនបាននាំមុខលើសលុបលើពាណិជ្ជកម្មទ្វេភាគី ដែលធ្វើឱ្យវៀតណាមត្រូវប្រឈមមុខនឹងឱនភាពពាណិជ្ជកម្ម ដែលកើនដល់ជាង ៥០ ប៊ីលានដុល្លារ។ នេះបើតាមការចុះផ្សាយរបស់កាសែត VnExpress កាលពីដើមសប្ដាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វៀតណាមបាននាំចេញទំនិញរបស់ខ្លួនទៅចិន ក្នុងតម្លៃ ៣៨,២៨ ប៊ីលានដុល្លារ ដោយកើនឡើង ៣,៩ ភាគរយ ធៀបនឹងរយៈពេលដូចគ្នានៅឆ្នាំមុន។ ទំនិញចំនួន ១០ មុខរបស់វៀតណាម ទទួលបានចំណូលលើសពី ១ ប៊ីលានដុល្លារ ដែលក្នុងនោះរួមមាន ទូរស័ព្ទដៃ និងគ្រឿងបន្លាស់, កុំព្យូទ័រ, ផលិតផលអេឡិចត្រូនិក និងគ្រឿងបន្លាស់, កាមេរ៉ា និងគ្រឿងបន្លាស់, បន្លែ និងផ្លែឈើ, ក៏ដូចជាគ្រឿងម៉ាស៊ីន ឧបករណ៍ និងគ្រឿងបន្លាស់របស់វាផ្សេងៗទៀត។

ប៉ុន្តែចិនវិញ បាននាំចូលទំនិញរបស់ខ្លួនទៅវៀតណាម ក្នុងតម្លៃ ៩២,៥ ប៊ីលានដុល្លារ ដោយកើនឡើង ៣៤,២៥ ភាគរយ ធៀបនឹងរយៈពេល៨ខែនាំដូចគ្នាកាលពីឆ្នាំមុន។ ជាលទ្ធផល វៀតណាមបានប្រឈមមុខនឹងឱនភាពពាណិជ្ជកម្មជាមួយចិនប្រមាណ ៥៤,២២ ប៊ីលានដុល្លារ ដោយលើសពីតួលេខឆ្នាំ ២០២៣ ជិត ៥ ប៊ីលានដុល្លារ។

ទំនិញរបស់ចិនភាគច្រើនជាផលិតផល និងវត្ថុធាតុដើម ដែលបម្រើឱ្យការផលិតដើម្បីនាំចេញ ដូចជា គ្រឿងម៉ាស៊ីន ឧបករណ៍ សារធាតុគីមី និងផលិតផលគីមី ប្លាស្ទិកគ្រប់ប្រភេទ និងផលិតផលប្លាស្ទិក សម្ភារៈវាយនភណ្ឌ ស្បែក និងស្បែកជើង ដែក និងដែកថែប និងសម្ភារៈសំណង់ជាដើម។ មន្រ្តីវៀតណាមធ្លាប់លើកឡើងថា ឱនភាពពាណិជ្ជកម្មជាមួយចិនប្រហែលជាមិនបង្កបញ្ហាចំពោះសេដ្ឋកិច្ចរបស់ប្រទេសនោះទេ ដោយសារតែទំនិញដែលវៀតណាមនាំចូលភាគច្រើន គឺដើម្បីបម្រើឱ្យផលិតកម្មក្នុងស្រុក។

គួរគូសបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ពាណិជ្ជកម្មរវាងវៀតណាម និងចិន នៅតែមានចំណុចលេចធ្លោ ទោះបីជាសេដ្ឋកិច្ចពិភពលោក ក៏ដូចជាចិនផ្ទាល់ មិនសូវជាដំណើរការស្រួលបួលក៏ដោយ។ កាលពីឆ្នាំមុន ពាណិជ្ជកម្មទ្វេភាគី បានកើនឡើងដល់ ១៧១,២ ប៊ីលានដុល្លារ ដោយការនាំចេញរបស់វៀតណាមទៅចិន មានជាង ៦០ ប៊ីលាន ខណៈការនាំចូលពីចិនមកវិញ មានប្រមាណជាង ១១០ ប៊ីលានដុល្លារ៕