សិប្បកម្មមួយ ជួយទិញគ្រាប់ល្ងពីកសិករប្រមាណជាង១០តោនក្នុងមួយឆ្នាំ ផលិតចេញជាប្រេងសុខភាព

សិប្បកម្មផលិតប្រេង ខេអេចបានកំពុងជួយទិញគ្រាប់ល្ងពីកសិករប្រមាណជាង១០តោនក្នុងមួយឆ្នាំ ដើម្បីផលិតចេញជាប្រេងសុខភាព សម្រាប់ដាក់លក់ក្នុងទីផ្សារប្រទេសកម្ពុជា និងកំពុងសិក្សាបន្ថែមនាំចេញទៅក្រៅប្រទេស។

ជាម្ចាស់សិប្បកម្មផលិតប្រេង ខេអេច ស្ថិតនៅក្រុងបាត់ដំបង ខេត្តបាត់ដំបង លោក ហ៊ូ សុភាព បានប្រាប់ កម្ពុជាថ្មី ថា សិប្បកម្មផលិតប្រេងល្ងរបស់លោក ទើបតែបានចាប់ផ្ដើមឡើងតាំងពីឆ្នាំ ២០២២ តែប៉ុណ្ណោះ តែអ្វីដែលទទួលបានជោគជ័យលឿន និងឆាប់រហ័យនោះ គឺសិប្បកម្មនេះ កំពុងទទួលបានទីផ្សារខ្ពស់គួរសម តាមរយៈការគាំទ្រផលិតផលរបស់សិប្បកម្មផ្ទាល់។

លោក បន្តថា ជាធម្យមសិប្បកម្មរបស់លោកបានជួយទិញគ្រាប់ល្ងពីកសិករ ប្រមាណជាង១០តោន​​​​ ឬអាចលើសពីនេះរហូតដល់ចន្លោះពី ៦០ ទៅ ៧០តោន ពីសហគមន៍មួយក្នុងខេត្តបាត់ដំបងមកផលិតជាប្រេងសុខភាព ដើម្បីចូលរួមចំណែកជួយដល់កសិករដែលកំពុងត្រូវការទីផ្សារពីការងារកសិកម្មរបស់ខ្លួនបានមួយកម្រិត។

លោក ហ៊ូ សុភាព បានបញ្ជាក់ទៀតដែរថា សម្រាប់ចក្ខុវិស័យរបស់សិប្បកម្មរបស់លោក នាពេលបច្ចុប្បន្ននេះ គឺធ្វើយ៉ាងណាផលិតប្រេងល្ងដែលមានគុណភាពខ្ពស់ សម្រាប់ចែកចាយជូនប្រជាជនខ្មែរទូទាំងប្រទេសបានប្រើប្រាស់ផលិតផលរបស់ខ្មែរសុទ្ធសាធ ដោយមិនប្រើប្រាស់សារធាតុរក្សាទុក ដែលនាំឱ្យប៉ះពាល់ដល់សុខភាពអ្នកប្រើប្រាស់។

ម្ចាស់សិប្បកម្មរូបនេះ បានប្រាប់ឱ្យដឹងទៀតថា ទាក់ទងនឹងអត្ថប្រយោជន៍របស់ប្រេងល្ងវិញ មានលក្ខណៈពិសេសមួយត្រង់ថាវាបានចូលរួមជួយដល់សុខភាពមនុស្សយ៉ាងច្រើនដូចជា៖ បំបាត់ការឈឺចាប់សន្លាក់រ៉ាំរ៉ៃ ជំនួយស្បែក និងឆ្អឹង កាត់បន្ថយកូឡេស្តេរ៉ុលក្នុងសរសៃឈាម ជំនួយបេះដូង និងសម្រួលចង្វាក់បេះដូង ការពារជំងឺមហារីក ជំនួយប្រព័ន្ធរំលាយអាហារ បន្ថយការឈឺចាប់ពេលមករដូវ ជួយឱ្យគេងលក់ស្រួល ជំនួយខួរក្បាល បង្កើនសមត្ថភាពចង់ចាំ និងជំនួយសុខភាពភ្នែក បានថែមទៀតផង។

លោក ហ៊ូ សុភាព បានបន្ថែមទៀតថា ក្រៅពីផលិតផលប្រេងល្ង ក្នុងសិប្បកម្មរបស់លោកក៏បានផលិតប្រេងសុខភាព ជាច្រើនមុខទៀតដែរ ក្នុងនោះមានដូចជា៖ ប្រេងម្ទេស​ ប្រេងម្រេច​ ​ ប្រេងសណ្តែកដី​ ដែលប្រេងទាំងនេះ សុទ្ធសឹងតែជាប្រេងជំនួយដល់សុខភាពអ្នកប្រើប្រាស់។

លោក ក៏ប្រាប់ឱ្យដឹងទៀតដែរថា សម្រាប់ទស្សនវិស័យទៅថ្ងៃខាងមុខ សិប្បកម្មរបស់លោកក៏គ្រោងនឹងពង្រីកការផលិតឱ្យបានកាន់តែច្រើនជាងនេះ ដើម្បីធ្វើយ៉ាងណាឱ្យផលិតផលប្រេងធម្មជាតិកាន់តែមានស្ដង់ដាខ្ពស់ និងអាចនាំចេញទៅកាន់ទីផ្សារអន្តរជាតិបានផងដែរ៕

អត្ថបទ ៖ សួស សិត