ព័ត៌មានអន្ដរជាតិ

ទំនុកចិត្តលើឧស្សាហកម្មថៃធ្លាក់ចុះ ដោយកម្សោយតម្រូវការ គ្រោះទឹកជំនន់

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

សហព័ន្ធឧស្សាហកម្មថៃ (FTI) បានឱ្យដឹងកាលពីថ្ងៃពុធថា ទំនុកចិត្តលើឧស្សាហកម្មរបស់ប្រទេស បានធ្លាក់ចុះកាលពីខែសីហា ដោយសារតែតម្រូវការក្នុងស្រុកខ្សោយ តម្លៃផលិតកម្មខ្ពស់ និងគ្រោះទឹកជំនន់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

FTI បាននិយាយថា សន្ទស្សន៍ទំនុកចិត្តឧស្សាហកម្ម បានធ្លាក់ចុះដល់ ៨៧,៧ ពិន្ទុ នៅខែសីហា ពី ៨៩,៣ ពិន្ទុ នៅខែកក្កដា ដែលវាបានកើនឡើងជាលើកដំបូងក្នុងរយៈពេល ៤ ខែ។ FTI និយាយក្នុងសេចក្តីថ្លែងការណ៍ថា តម្រូវការក្នុងស្រុកបានធ្លាក់ចុះ ដែលធ្ងន់ធ្ងរដោយការធ្លាក់ចុះ ២៤ ភាគរយ នៃការលក់រថយន្តសម្រាប់រយៈពេល ៧ ខែដើមឆ្នាំនេះ (អត្រាប្រចាំឆ្នាំ) ដោយសារស្ថាប័នហិរញ្ញវត្ថុរឹតបន្តឹងលើការផ្តល់ប្រាក់កម្ចី។

សហព័ន្ធក៏បាននិយាយផងដែរថា ការនាំចេញបានរងផលប៉ះពាល់ដោយកំណើននៃតម្លៃប្រាក់បាតដល់កម្រិតខ្ពស់ក្នុងរយៈពេល ១៩ ខែ ធៀបនឹងប្រាក់ដុល្លារអាមេរិក។ ប្រាក់បាត បានឡើងថ្លៃ ២,៣ ភាគរយ ធៀបនឹងប្រាក់ដុល្លារក្នុងឆ្នាំនេះ ដែលធ្វើឱ្យវាក្លាយជារូបិយប័ណ្ណខ្លាំងទី២របស់អាស៊ី បន្ទាប់ពីប្រាក់រីងហ្គីតរបស់ម៉ាឡេស៊ី។ វិស័យនាំចេញនៅតែទទួលរងនូវថ្លៃដឹកជញ្ជូនខ្ពស់ ជាពិសេសផ្លូវទៅកាន់សហរដ្ឋអាមេរិក និងអឺរ៉ុប។

ជាមួយគ្នានោះ FTI បានបន្តថា ទឹកជំនន់នៅតាមតំបន់មួយចំនួនរបស់ប្រទេសថៃ បានបង្ខូចបង្ខាតដល់វិស័យកសិកម្ម ឧស្សាហកម្ម និងសំណង់។ សហព័ន្ធដដែលបន្ថែមថា រដ្ឋាភិបាលគួរតែមានការគាំទ្រសម្រាប់អាជីវកម្មដែលរងគ្រោះដោយទឹកជំនន់ ហើយបានអំពាវនាវឱ្យរដ្ឋាភិបាលប្រកាសវិធានការគាំទ្រសេដ្ឋកិច្ចនៅឆ្នាំនេះ។

ទោះជាយ៉ាងណាក៏ដោយ FTI បានកត់ត្រាពីកត្តាវិជ្ជមានមួយចំនួនក្នុងខែសីហា រួមទាំងស្ថិរភាពនយោបាយដែលជួយស្ដារទំនុកចិត្តរបស់អ្នកវិនិយោគ និងយុទ្ធនាការជំរុញសេដ្ឋកិច្ចដែលបានធ្វើឡើងពីរដ្ឋាភិបាលមុន៕