សហគមន៍មួយ ជួយរកប្រាក់ចំណូលដល់គ្រួសារក្រក្រី តាមរយៈការលក់ផលិតផលធ្វើពីដើមឫស្សី

សហគមន៍កន្រ្តកស្នាដៃខ្មែរ ដែលមានទីតាំងស្ថិតនៅ ក្រុងសរីសោភ័ណ ខេត្តបន្ទាយមានជ័យ បានកំពុងចូលរួមជួយបង្កើតប្រាក់ចំណូលដល់គ្រួសារក្រក្រី តាមរយៈផលិតផលធ្វើពីដើមឬស្សី និងដើមរុក្ខជាតិផ្សេងៗ សម្រាប់លក់នៅលើទីផ្សារ។

បុរសស្ថិតក្នុងវ័យ ៤២ឆ្នាំ លោក សំ សុភ័ក្រ ​ជាប្រធានសហគមន៍ កន្រ្តកស្នាដៃខ្មែរ បានប្រាប់ កម្ពុជាថ្មី ថា មូលហេតុដែលលោកបង្កើតសហគមន៍នេះឡើងមកដោយសារតែ លោកបានមើលឃើញថាប្រជាពលរដ្ឋដែលរស់នៅក្នុងសហគមន៍របស់លោកភាគច្រើន សុទ្ធសឹងតែជាគ្រួសារក្រក្រី និងមានជីវភាពខ្វះខាតួយ៉ាងខ្លាំង ហេតុនេះហើយទើបលោកសម្រេចចិត្តបង្កើតសហគមន៍នេះឡើងមកកាលពីអំឡុងឆ្នាំ ២០១៩ ពោលគឺនៅពេលដែលប្រទេសកម្ពុជាបានជួបប្រទះនឹងជំងឺកូវីដ-១៩ ។

លោក សំ សុភ័ក្រ  បន្តថា រាល់ស្នាដៃដែលបានផលិតចេញពីប្រជាសហគមន៍ ភាគច្រើននោះមានដូចជា៖ កន្ដ្រកយួរដៃ និងធុងសំរាម ធ្វើឡើងពីដើម​​ឫស្សី ផ្ដៅ រពាក់ និងកំប្លោក សុទ្ធសឹងតែធ្វើឡើងដោយដៃទាំងអស់។

លោក ប្រាប់ឱ្យដឹងទៀតថា សម្រាប់ការងាររបស់សហគមន៍ទាំងមូល ជាគោលដៅចម្បងមិនមែនគ្រាន់តែលក់ផលិតផលដើម្បីប្រាក់ចំណេញតែមួយមុខប៉ុណ្ណោះទេ តែអ្វីដែលសំខាន់គឺធ្វើយ៉ាងណាជួយឱ្យប្រជាពលរដ្ឋក្នុងសហគមន៍ អាចមានឱកាសបង្កើតការងារសម្រាប់ខ្លួនឯង រកប្រាក់ចំណូលដើម្បីផ្គត់ផ្គង់គ្រួសារបានថែមទៀតផង។

លោក សំ សុភ័ក្រ បញ្ជាក់ទៀតដែរថា សម្រាប់ទីផ្សាររយៈពេលចុងក្រោយនេះ សហគមន៍កំពុងតែមានការងារធ្វើយ៉ាងច្រើនគួរសម តាមរយៈអតិថិជន ដែលតែងតែជួយទិញផលិតកន្រ្ដក និងសម្ភារៈធ្វើពីឫស្សី សម្រាប់យកទៅធ្វើបុណ្យក្នុងឱកាសបុណ្យភ្ជុំបិណ្ឌខាងមុខនេះ។ ជាក់ស្ដែង ក្នុងមួយថ្ងៃ សហគមន៍អាចលក់ផលិតផលពីដើមឫស្សី បានចន្លោះពី ៣០០ ទៅ ៤០០កន្រ្ដក ជារៀងរាល់ថ្ងៃ។

លោក សំ សុភ័ក្រ ក៏សូមលើកទឹកចិត្តប្រជាជនខ្មែរទាំងអស់សូមមេត្តាជួយគាំទ្រផលិតដែលជាស្នាដៃរបស់ប្រជាសហគមន៍​ទាំងនេះ ដើម្បីចូលរួមចំណែកបង្កើតការងារជូនគ្រួសារក្រក្រីក្នុងសហគមន៍ កាន់តែមានប្រាក់ចំណូលសម្រាប់ផ្គត់ផ្គង់គ្រួសារ៕

អត្ថបទ ៖ សួស សិត