ព័ត៌មានអន្ដរជាតិ

តម្លៃប្រេងបញ្ចប់ការជួញដូរដោយធ្លាក់ចុះ ប៉ុន្តែកើនឡើងសម្រាប់អត្រាប្រចាំសប្ដាហ៍

បានផុស

៣ ខែ មុន

នៅ

ថ្ងៃសៅរ៍ ២១ កញ្ញា ២០២៤

ដោយ

តម្លៃប្រេងបានធ្លាក់ចុះកាលពីថ្ងៃសុក្រ ដែលជាថ្ងៃបញ្ចប់ការជួញដូរប្រចាំសប្ដាហ៍ ប៉ុន្តែនៅតែមើលឃើញពីកំណើនសម្រាប់អត្រាប្រចាំសប្ដាហ៍ ដែលជំរុញដោយការកាត់បន្ថយអត្រាការប្រាក់របស់សហរដ្ឋអាមេរិក និងការធ្លាក់ចុះនៃការផ្គត់ផ្គង់ប្រេងរបស់សហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងម៉ាក Brent បានធ្លាក់ចុះ ៣៩ សេន ឬ ០,៥២ ភាគរយ ដោយជួញដូរនៅតម្លៃ ៧៤,៤៩ ដុល្លារ/បារ៉ែល ខណៈតម្លៃប្រេងឆៅអាមេរិក ម៉ាក WTI បានធ្លាក់ចុះ ៣ សេន ឬ ០,០៤ ភាគរយ មកនៅត្រឹម ៧១,៩២ ដុល្លារ/បារ៉ែល។

តម្លៃប្រេងក្នុងរយៈពេលប៉ុន្មានសប្ដាហ៍ចុងក្រោយនេះ បានបង្ហាញពីនិន្នាការធ្លាក់ចុះ ដោយសារតែប្រទេសដែលប្រើប្រេងធំៗបានជួបនូវបញ្ហាសេដ្ឋកិច្ច ដោយកម្សោយតម្រូវការ និងផលិតកម្ម។ យ៉ាងណាមិញ តម្លៃប្រេងទាំង២ ប្រចាំសប្ដាហ៍នេះ នៅតែបង្ហាញពីកំណើនច្រើនជាង ៤ ភាគរយ។

នេះបង្ហាញថា តម្លៃប្រេងបានងើបស្ទុះឡើងវិញ បន្ទាប់ពីតម្លៃប្រេងម៉ាក Brent បានធ្លាក់ចុះដល់ ៦៩ ដុល្លារ/បារ៉ែល កាលពីថ្ងៃទី ១០ ខែកញ្ញា ដែលជាតម្លៃទាបបំផុត ក្នុងរយៈពេល ៣ ឆ្នាំ។

កាលពីថ្ងៃព្រហស្បតិ៍ តម្លៃបានកើនឡើង១ភាគរយ ក្រោយធនាគារកណ្ដាលអាមេរិក សម្រាប់ចិត្តកាត់បន្ថយអត្រាការប្រាក់ប្រមាណ ០,៥ ភាគរយ។ ជាធម្មតា វិធានការបែបនេះតែងជំរុញសកម្មភាពសេដ្ឋកិច្ច និងតម្រូវការថាមពល ដែលធ្វើឱ្យតម្លៃប្រេងកើនឡើង។ យ៉ាងណាក៏ដោយ អ្នកវិភាគមួយចំនួននៅតែមានការព្រួយបារម្ភអំពីអត្រាអត់ការងារធ្វើនៅអាមេរិក ដែលអាចមានបន្ទុកសម្រាប់សេដ្ឋកិច្ច នៅមានសម្ពាធលើតម្រូវការ និងផលិតកម្ម។

ទោះជាយ៉ាងណាក៏ដោយ ភាពតានតឹងនៅមជ្ឈិមបូព៌ា រវាងអ៊ីស្រាអែល និងក្រុមប្រដាប់អាវុធលីបង់ ហេសប៊ូឡា ក៏បង្កក្ដីបារម្ភផងដែរ ចំពោះការផ្គត់ផ្គង់ប្រេង ដែលអាចធ្វើឱ្យតម្លៃប្រេងស្ទុះងើបឡើងវិញ។ ប៉ុន្តែតម្រូវការខ្សោយនៅចិន ដែលជាប្រទេសប្រើប្រេងធំបំផុតនៅលើពិភពលោក អាចបន្តរាំងស្ទះដល់កំណើននេះ៕