កម្ពុជាកំពុងជំរុញការនាំចេញផលិតផលគ្រាប់ស្វាយចន្ទីទៅទីផ្សារអឺរ៉ុប និងអារ៉ាប់

កម្ពុជាកំពុងជំរុញការនាំចេញផលិតផលគ្រាប់ស្វាយចន្ទីទៅកាន់ទីផ្សារពិភពលោក ស្របពេលដែររដ្ឋាភិបាលបានកំណត់គោលដៅនៃការនាំចេញដើម្បីធ្វើឱ្យកម្ពុជាក្លាយជាអធិរាជស្វាយចន្ទីនារយៈពេលប៉ុន្មានខាងមុខ។

លោក ងិន ឆាយ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកសិកម្ម នៃក្រសួងកសិកម្ម រុក្ខា​ប្រមាញ់ និងនេសាទ មានប្រសាសន៍នៅថ្ងៃទី ២២ ខែកញ្ញា ឆ្នាំ ២០២៤ ថា គ្រាប់​ស្វាយ​ចន្ទី​កម្ពុជា​មានគុណភាពល្អ ប្រភេទពូជ M23 មានគ្រាប់ធំ និងរសជាតិឆ្ងាញ់ ដែល​ទីផ្សារ​ពិភព​លោក​កំ​ពុង​តែរង់ចាំគ្រាប់ស្វាយចន្ទីរបស់កម្ពុជា។

លោក ងិន ឆាយ ថ្លែងថា៖ «យើងនឹងបន្តផ្សព្វផ្សាយ ការនាំចេញគ្រាប់ស្វាយចន្ទីយើង​ទៅប្រទេស​ជា​ច្រើនទៀត ដូចជាទៅប្រទេសអារ៉ាប់ ឬទីផ្សារសហភាពអឺរ៉ុប និងជប៉ុនជាដើម ដើម្បីពង្រីក​ទី​ផ្សារ​​​របស់កម្ពុជាយើងង»។

លោក អួន ស៊ីឡុត ប្រធានសមាគមស្វាយចន្ទីកម្ពុជា​ មានប្រសាសន៍ថា ទីផ្សារនាំចេញស្វាយចន្ទី​កម្ពុជា​ទៅសហភាពអឺរ៉ុប និងអារ៉ាប់ និងប្រទេសជប៉ុន មានកម្រិតតិចតួចនៅឡើយ។ លោកថា បច្ចុប្បន្ន​ទីផ្សារគ្រាប់ស្វាយចន្ទីធំជាងគេគឺប្រទេសវៀតណាម។

គិតចាប់ពីខែមករា ដល់ខែសីហា ឆ្នាំ ២០២៤ ការប្រមូលផលស្វាយចន្ទីកម្ពុជា​សម្រេច​បាន​ប្រមា​ណ​ ៨៧ ម៉ឺនតោន ក្នុងនោះនាំចេញទៅវៀតណាមជិត ៨០ ម៉ឺនតោន គិតជាទឹក​ប្រាក់​ប្រមា​ណ​ ១ ពាន់ ២ រយលានដុល្លារ។ នេះបើយោងតាមសមាគមស្វាយចន្ទីកម្ពុជា។

ស្វាយចន្ទី គឺជាកសិផលដ៏សំខាន់​ និងជាដំណាំយុទ្ធសាស្ត្រមួយរបស់កម្ពុជា ដោយគិតត្រឹម​ឆ្នាំ​២០២៤នេះ ប្រទេស​កម្ពុជា​មានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំង​ប្រ​ទេស​ ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា៕

អត្ថបទ៖ ឡេង ដេត