រដ្ឋមន្ត្រីទេសចរណ៍ដឹកនាំគណៈប្រតិភូ ចូលរួមពិព័រណ៍ទេសចរណ៍ចិន-អាស៊ាន

លោក ហួត ហាក់ រដ្ឋមន្រ្តីក្រសួងទេសចរណ៍ នៅព្រឹកថ្ងៃទី ២៤ ខែកញ្ញា ឆ្នាំ ២០២៤ នេះ បាន​អញ្ជើញដឹកនាំគណៈប្រតិភូជាន់ខ្ពស់ក្រសួងចូលរួមពិព័រណ៍ទេសចរណ៍ចិន-អាស៊ាន China-Asean EXPO Tuorism Exhibition ចាប់ពីថ្ងៃទី២៤-២៦ ខែកញ្ញា ឆ្នាំ២០២៤ នៅទីក្រុង Guilin ខេត្ត Guangxi សាធារណៈរដ្ឋប្រជាមានិតចិន។

ពិព័រណ៍ទេសចរណ៍ចិន-អាស៊ានរៀបចំឡើងក្រោមប្រធានបទ “សមាហរណកម្មស៊ីជម្រៅ​នៃវប្បធម៌ និងទេសចរណ៍ រួមគ្នា​កសាងខ្សែក្រវាត់ និងផ្លូវ” នៅទីក្រុងគួយលីន ខេត្តក្វាងស៊ី (GuangXi) សាធារណរដ្ឋប្រជាមានិតចិន។

ក្នុងនាមជាប្រទេសកិត្តិយស លោក ហួត ហាក់ នឹងថ្លែងសុន្ទរកថាក្នុងពិធីបើក ស្តីអំពីវឌ្ឍនភាព​វិស័យទេសចរណ៍កម្ពុជា ការបន្តជំរុញកិច្ចសហប្រតិបត្តិការទ្វេភាគី ក៏ដូចជាកិច្ចសហប្រតិបត្តិ​ការចិន-អាស៊ាន និងជំរុញការផ្សព្វផ្សាយយុទ្ធនាការ “ឆ្នាំទស្សនាសៀមរាប ២០២៤”  ជាពិសេស​ដើម្បីបន្តជំរុញការអនុវត្ត “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤” ឱ្យកាន់តែទូលំ​ទូលាយ​ទៅកាន់ទីផ្សារចិន និងអន្តរជាតិ។

សូមជំរាបផងដែរថា កម្ពុជាបានជ្រើសរើសយកខេត្តសៀមរាបចូលរួមផ្សព្វផ្សាយក្នុងព្រឹត្តិការណ៍ពិព័រណ៍ចិន-អាស៊ានលើកទី២១ នៅទីក្រុងណាន​នីង សាធារណរដ្ឋប្រជាមានិតចិន។

ពិព័រណ៍ចិន-អាស៊ាន គឺជាវេទិកាផ្លាស់ប្ដូរពាណិជ្ជកម្ម និងវិនិយោគរវាងបណ្ដា​ប្រទេស​ជា​សមាជិកអាស៊ាន និងប្រទេសចិន៕