សាច់ជ្រូក សាច់មាន់ មិនឡើងថ្លៃទេ ក្នុងឱកាសបុណ្យភ្ជុំបិណ្ឌ

សមាគមអ្នកចិញ្ចឹមសត្វនៅកម្ពុជាបានឱ្យដឹងថា ស្ថានភាពតម្លៃសាច់ជ្រូក មាន់ ទា នៅលើទីផ្សារមានភាពល្អប្រសើរ ពោលគឺមិនមានការឡើង​ថ្លៃនោះ​ទេ នាឱកាសបុណ្យភ្ជុំបិណ្ឌឆ្នាំនេះ។

លោក ស៊្រុន ពៅ ប្រធានសមាគមអ្នកចិញ្ចឹមសត្វនៅកម្ពុជា ប្រាប់កម្ពុជាថ្មីនៅថ្ងៃទី ២៥ ខែកញ្ញា ឆ្នាំ ២០២៤ នេះថា៖ «នៅរដូវកាន់បិណ្ឌឆ្នាំនេះ តម្រូវការសាច់របស់យើងក៏អត់ខ្វះ តម្លៃក៏អត់​ឡើង ឆ្នាំនេះល្អប្រសើរមែនទែនហើយ អត់មានបញ្ហាអ្វីទេ»។

លោក ម៉ូវ ឃាង ម្ចាស់សត្តឃាតដ្ឋាននៅក្រុងតាខ្មៅបានឱ្យដឹងដែរថា តម្លៃសាច់ជ្រូកមិន​មាន​ការ​​ឡើងថ្លៃទេ នៅរដូវបុណ្យភ្ជុំឆ្នាំនេះ ដោយលោកអះអាងថា នៅតែមានការនាំចូល​សាច់​បង្កក​​។

លោក ម៉ូវ ឃាងបញ្ជាក់ថា៖ «សាច់បង្កកនៅតែមាននាំចូល ដល់អញ្ចឹងធ្វើឱ្យតម្លៃក៏ឡើងអត់រួច បរិមាណ​ក៏មិន​ច្រើន កន្លែង​ខ្ញុំមានការធ្លាក់ចុះចំនួនជ្រូកបន្តិចផង ជ្រូកតាមក្រុមហ៊ុនមួយចំនួន កាល​ណា​បើជ្រូកយើងលក់អស់ស្ដុកបានន័យ ថា គីឡូរបស់វាធម្មតា ដូចថា ១១០ គីឡូ គេចាប់​ចេញ​ពីក​សិដ្ឋាន តែឥឡូវឃើញគីឡូឡើងដល់ជិត ១៣០ ហើយ ចឹងបាន​ន័យថា ជ្រូកនៅ​សល់ច្រើន ជ្រូកហ្នឹងចាល់លក់អត់ទាន់»។

បច្ចុប្បន្នតម្លៃសាច់ជ្រូករស់ចន្លោះពី ៩.០០០ រៀល ទៅ ១០.​០០០ រៀល ក្នុងមួយគីឡូក្រាម។ ចំណែកសាច់ជ្រូកនៅលើទីផ្សារ ចន្លោះពី ១៦.០០០ រៀលក្នុងមួយគីឡូក្រាម ដល់ ២.៥០០០ រៀល ​​ទៅតាមប្រភេទសាច់។ ចំណែកឯសាច់មាន់មានតម្លៃ ១៥.០០០ រៀល ក្នុងមួយគីឡូ​ក្រាម។

យោងតាមសមាគមអ្នកចិញ្ចឹមសត្វ កម្ពុជាមានតម្រូវការសាច់ជ្រូកប្រមាណ ៨ ពាន់ក្បាល ទៅ ៩ ពាន់ក្បាលក្នុងមួយថ្ងៃនៅទូទាំងប្រទេស៕

អត្ថបទ៖ ឡេង ដេត