អ្នកធ្វើដំណើរមកពីប្រទេសកម្ពុជានឹងមានជម្រើស​ហោះហើរទៅកាន់អាមេរិកខាងជើង

ក្រុមហ៊ុនអាកាសចរណ៍ឈានមុខគេរបស់កូរ៉េខាងត្បូង Korean Air ប្រកាសពីការបង្កើនជើងហោះហើររបស់ខ្លួនមកកាន់ប្រទេសនានានៅអាស៊ានដែលរួមទាំងកម្ពុជា និងការបង្កើនជើងហោះហើរមួយចំនួនទៀតទៅកាន់អឺរ៉ុប និងសហរដ្ឋ​អាមេរិកដែលជាការផ្តល់ជម្រើសកាន់តែច្រើនដល់ភ្ញៀវទេចរជាតិ និងអន្តរជាតិ។​

លោក Jayme Lee ដែលជាភ្នាក់ងាររបស់ក្រុមហ៊ុន Korean Air បានថ្លែងប្រាប់កម្ពុជាថ្មីថា អ្នកដំណើរនៅលើសេវា ភ្នំពេញ-សេអ៊ូល អ៊ីនឈុន របស់ក្រុមហ៊ុនអាកាសចរណ៍ Korean Air អាចភ្ជាប់ជើងហោះហើរទាំងនេះទៅកាន់អាមេរិកខាងជើងបានចាប់ពីពេលនេះតទៅ។

​លោកបានបញ្ចាក់ទៀតថា៖«សម្រាប់ការ​អាជីវកម្មរលើវិស័យដឹកជញ្ជូនវាងកូរ៉េខាងត្បូង និងកម្ពុជា ត្រូវបានជំរុញដោយសារកំណើននៃក្រុមហ៊ុនកូរ៉េខាងត្បូងដែលមានប្រហែល 300 ដែលកំពុងប្រតិបត្តិការនៅក្នុងប្រទេសកម្ពុជាក្នុងវិស័យផ្សេងៗដូចជា ផលិតកម្ម សំណង់ និងហិរញ្ញវត្ថុ»។

លោកថា ​ បច្ចុប្បន្នក្រុមហ៊ុនអាកាសចរណ៍ Korean Air ហោះហើរទៅកាន់គោលដៅចំនួន ១៣ នៅអាមេរិកខាងជើងមានដូចជាទីក្រងុ Los Angeles, New York, Boston, Seattle, Chicago, Dallas, Toronto និង San Francisco។

យោង​តាមរបាយការណ៍របស់គ្រឹះស្ថានអង្គរនៅក្នុងរយៈពេល ៨ ខែ ឆ្នាំ ២០២៤ មាន​ភ្ញៀវទេស​ចរ​​បរទេស​ជាង ៦៥ ម៉ឺន បានទិញសំបុត្រ​ចូលទស្សនារមណី​យដ្ឋាន​អង្គរ គិតជាទឹក​ប្រាក់​​​ប្រមាណ​​ជាង ៣០ លានដុល្លារ កើនឡើង ៣១,៣៦% ប្រៀបធៀបរយៈពេលដូចគ្នានៅឆ្នាំ ២០២៣។

យោងតាមក្រសួងទេសចរណ៍ គិតចាប់ពីខែមករា ដល់ខែកក្កដា ឆ្នាំ ២០២៤ កម្ពុជា​ទទួល​បាន​ភ្ញៀវ​បរទេសជាង ៣,៧៤ លាន​នាក់ កើន​ឡើង ២៣,២​ ភាគ​រយ​​ធៀបនឹង​​រយៈ​ពេល​ដូច​គ្នា​ឆ្នាំ​ ២០២៣ដែល​មាន​ចំនួន ៣,០៣ លាននាក់។

ក្នុងចំណោមទេសចរជាង ៣,៧៤ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ១ ១៤៧ ៥៣៤ នាក់ កើន ១១,៦% វៀតណាមចំនួន ៧៥៧ ៤៣៧ កើន ៣៧,៤% ចិន ៤៦៣ ៩៨០ នាក់ កើន ៤៥,៧% ឡាវ ២២៤ ៨៧១ កើន ២៩,៣% អាមេរិក ១១៧ ២២៣ នាក់ កើន ១៧%៕