ក្រុមហ៊ុនចិនចាប់អារម្មណ៍សិក្សាលទ្ធភាពបង្កើតរោងចក្រ កែច្នៃផលិតផលកសិកម្មនៅកម្ពុជា ដើម្បីនាំចេញ

លោក តូច ប៊ុនហួរ រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ២៥ ខែកញ្ញា ឆ្នាំ ២០២៤ បានទទួលជួបជាមួយ​គណៈប្រតិភូ​នៃសាធារណរដ្ឋប្រជាមានិតចិន ដើម្បីស្វែងយល់ឱកាស​វិនិយោគលើវិស័យកសិកម្ម និងកសិ-ឧស្សាហកម្មនៅកម្ពុជា ដោយសហការជាមួយក្រុមហ៊ុនក្នុងស្រុក Santana Agro Product Co., Ltd.។

គណៈប្រតិភូនៃសាធារណរដ្ឋប្រជាមានិតចិន មកពីក្រុមហ៊ុន Sichuan Pan-Asia Investment Co., Ltd. មានមូលដ្ឋាននៅទីក្រុងស៊ីឈួន បានបង្ហាញការចាប់អារម្មណ៍វិនិយោគលើវិស័យកសិកម្ម និងកសិ-ឧស្សាហកម្មនៅកម្ពុជា ដោយផ្ដើមចេញពីការសិក្សាស្វែងយល់ឱកាស​វិនិយោគនូវប្រភេទ​ដំណាំសក្តានុពល ឈានដល់ការផ្គត់ផ្គង់កសិផល ឬផលិតផល​កសិកម្មកែច្នៃ ទៅទីផ្សារនៃសាធារណរដ្ឋប្រជាមានិតចិន។

សូមបញ្ជាក់ថា បច្ចុប្បន្ននេះ ក្រុមហ៊ុនបាននិងកំពុងវិនិយោគ​វិស័យ​កសិកម្ម (ដំណាំដំឡូងមី) នៅប្រទេសឡាវ និងបានបង្កើត​សួន​​​​​​ឧស្សាហកម្ម​​ចំនួនមួយកន្លែងនៅក្នុងប្រទេសឡាវ និងមានក្រុមហ៊ុន​បុត្រ​សម្ព័ន្ធនៅប្រទេសថៃ ឈ្មោះ Pan-asia Investment ដែលវិនិយោគ​លើ​ការ​កែច្នៃម្សៅដំឡូងមី។

ជាលទ្ធផលនៃជំនួបនោះ គណៈប្រតិភូបានទទួលយកនូវ​ការណែនាំ​ពីលោក តូច ប៊ុនហួរ ដើម្បីសិក្សាពីលទ្ធភាពការវិនិយោគ​លើការកែច្នៃស្វាយចន្ទី ម្រេច និងដំឡូងមី ដើម្បីនាំចេញទៅកាន់ទីផ្សារចិន។

ក្រុមហ៊ុនក៏នឹងសិក្សាពីលទ្ធភាពបង្កើតសួនឧស្សាហកម្មនៅតំបន់ជិតផ្លូវរថភ្លើង ព្រមទាំងលទ្ធភាពបង្កើតរោងចក្រផលិតជីនិងថ្នាំកសិកម្មនៅកម្ពុជាផងដែរ៕