ព័ត៌មានអន្ដរជាតិ

សន្ទស្សន៍ផលិតកម្មថៃនឹងធ្លាក់ចុះ ១ ភាគរយ ដោយសារបញ្ហាសេដ្ឋកិច្ច និងគ្រោះទឹកជំនន់

បានផុស

៦ ខែ មុន

នៅ

ថ្ងៃចន្ទ ៣០ កញ្ញា ២០២៤

ដោយ

ការិយាល័យសេដ្ឋកិច្ចឧស្សាហកម្មថៃ (OIE) បានឱ្យដឹងថា សន្ទស្សន៍ផលិតកម្មរោងចក្រ (MPI) របស់ប្រទេសថៃ រំពឹងថានឹងធ្លាក់ចុះ ១ ភាគរយ នៅឆ្នាំ ២០២៤ នេះ ដោយសារតែបញ្ហាសេដ្ឋកិច្ចផ្សេងៗគ្នា និងគ្រោះទឹកជំនន់យ៉ាងធ្ងន់ធ្ងរ ដែលថៃកំពុងជួបប្រទះក្នុងរយៈពេលប៉ុន្មានខែចុងក្រោយ។ នេះបើតាមការចុះផ្សាយរបស់កាសែត The Thaiger កាលថ្ងៃសុក្រសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយក OIE លោក Warawan Chitaroon បានបង្ហាញថា លទ្ធផលដែលអាចល្អបំផុតសម្រាប់កំណើន MPI គឺវានឹងបន្តខ្សោយ។ កាលពីមុន ការិយាល័យបានកែសម្រួលការព្យាករណ៍កំណើន MPI របស់ខ្លួនពីចន្លោះពី ២-៣ ភាគរយ ទៅ 0-១ ភាគរយ ប៉ុន្តែកាលពីសប្ដាហ៍មុន បានបន្តកែសម្រួលការព្យាករនេះជាអវិជ្ជមាន ដល់ -១ ដល់ 0 ភាគរយ។

ចន្លោះពីខែមករា ដល់ខែសីហា ថៃបានកត់ត្រាពីកំណើន MPI ក្នុងរង្វង់ ១,៥៥ ភាគរយ ជាមួយនឹងអត្រាសមត្ថភាពផលិតកម្មប្រមាណ ៥៨,៩ ភាគរយ។ យ៉ាងណាមិញ ទឹកជំនន់នៅភាគខាងជើងប្រទេសថៃ បានរួមចំណែកដល់ការធ្លាក់ចុះនៃ MPI រហូតដល់ ១,៩១ ភាគរយ ក្នុងខែសីហា។

ទឹកជំនន់បានរំខានដល់ការធ្វើដំណើរ ការដឹកជញ្ជូនទំនិញ និងពាណិជ្ជកម្មតាមព្រំដែន បណ្តាលឱ្យរោងចក្រមួយចំនួនផ្អាកដំណើរការ។ លោក Warawan បាននិយាយថា តំបន់ទេសចរណ៍នៅតំបន់ដែលងាយរងគ្រោះដោយទឹកជំនន់ ក៏ត្រូវបានបិទផងដែរ ក្រោមហេតុផលសុវត្ថិភាព។ លោកបន្តថា៖ «ប្រសិនបើការស្ទុះងើបឡើងវិញនៃតំបន់លិចទឹកមានភាពយឺតយ៉ាវ អំណាចទិញរបស់អ្នកប្រើប្រាស់ និងអ្នកផលិតក្នុងតំបន់ដែលរងផលប៉ះពាល់ នឹងទទួលរងនូវផលប៉ះពាល់យ៉ាងខ្លាំង»។

ជាមួយគ្នានេះ ការធ្លាក់ចុះនៃការលក់រថយន្តក្នុងស្រុក ក៏បានប៉ះពាល់ដល់ MPI នៅខែសីហាផងដែរ។ ផលិតកម្មរថយន្តបានធ្លាក់ចុះ ១៨,៤ ភាគរយ ក្នុងអត្រាប្រចាំខែ ដោយសារលក្ខណៈវិនិច្ឆ័យតឹងរ៉ឹងរបស់គ្រឹះស្ថានហិរញ្ញវត្ថុ ចំពោះការផ្តល់ប្រាក់កម្ចីរថយន្តចំពេលមានបំណុលគ្រួសារខ្ពស់៕