រដ្ឋមន្រ្តីក្រសួងពាណិជ្ជកម្ម៖ជនអនាមិកបានយកឈ្មោះ និងរូបថតបង្កើតគណនីតេឡេក្រាមក្លែងក្លាយ

លោកស្រី ចម និម្មល រដ្ឋមន្រ្តីក្រសួងពាណិជ្ជកម្មបានអំពាវនាវដល់សាធារណជនកុំឱ្យចាញ់បោកជនខិលខួចមួយចំនួនបានយកឈ្មោះ និងរូបថតលោកស្រីដើម្បីបង្កើតជាគណនីតេឡេក្រាមដើម្បីទាក់ទាញឱ្យបណ្តាក់ទុនវិនិយោគនានាដោយសន្យាថានឹងផ្តល់នូវចំណូលខ្ពស់។

យោងតាមសេចក្តីប្រកាសរបស់លោកស្រី នៅរសៀលថ្ងៃទី៣០ខែតុលា ជនអនាមិកបានបង្កើតនូវគណីតេឡេក្រាមនានាដោយមានរូបថត និងឈ្មោះលោកស្រី ដើម្បីបោកបញ្ឆោតសាធរណជនឱ្យបណ្តាក់ទុនរកស៊ីឬវិនិយោគ។

លោកស្រីបានគូសបញ្ជាក់ថា៖«សូមជម្រាបជូនដល់សាធារណជនមេត្តាជ្រាបថា មានជនខិលខូចបានយកឈ្មោះ និងរូបថតនាងខ្ញុំទៅបង្កើតគណនីតេឡេក្រាមក្លែងក្លាយ ពាក់ព័ន្ធនឹងការវិនិយោគបោកប្រាស់ផ្សេងៗ និងបានផ្ញើសារឆ្លើយឆ្លងទៅកាន់សាធារណៈជននាពេលកន្លងមក»។

«នាងខ្ញុំសូមបញ្ជាក់ថាគណនីនេះជាគណនីក្លែងក្លាយ សូមបងប្អូនមេត្តាប្រុងប្រយ័ត្ន និងកុំចាញ់បោកការឆបោករបស់ជនល្មើសនេះ។ ​នាងខ្ញុំសូមប្រកាសបដិសេធ និងមិនទទួលខុសត្រូវចំពោះទង្វើឆបោកនានារបស់បុគ្គលនេះ និងសូមអរគុណចំពោះក្តីស្រឡាញ់ រាប់អានពីសំណាក់ អ៊ំ ពូមីង បងប្អូនទាំងអស់»។ នេះបើយោងតាមការបញ្ជាក់របស់លោកស្រី ចម និម្មល៕​