ព័ត៌មានអន្ដរជាតិ

ទីក្រុងចិនធំៗ បន្ធូរបន្ថយគោលការណ៍ទិញផ្ទះ ដើម្បីជំរុញទីផ្សារអចលនទ្រព្យ

បានផុស

៤ ខែ មុន

នៅ

ថ្ងៃចន្ទ ៣០ កញ្ញា ២០២៤

ដោយ

ទីក្រុងធំៗរបស់ប្រទេសចិនចំនួន៣ នៅថ្ងៃចន្ទនេះ បានប្រកាសពីការបន្ធូរបន្ថយការរឹតបន្តឹងលើគោលការណ៍ទិញផ្ទះ ខណៈធនាគារកណ្តាលចិន បានស្នើសុំឱ្យស្ថាប័នហិរញ្ញវត្ថុកាត់បន្ថយអត្រាការប្រាក់កម្ចីទិញផ្ទះ ដើម្បីជំរុញទីផ្សារអចលនទ្រព្យ។ នេះបើតាមការចុះផ្សាយរបស់កាសែត The Business Times។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាគឺជាវិធានការចុងក្រោយបង្អស់របស់រដ្ឋាភិបាលចិន ក្នុងគោលបំណងជំរុញសេដ្ឋកិច្ចដើម្បីសម្រេចបានគោលដៅកំណើន ៥ ភាគរយ ខណៈវិស័យអចលនទ្រព្យ ដែលរួមចំណែកប្រហែលប្រមាណ ១/៤ នៃផលិតផលក្នុងស្រុកសរុប បានជាប់គាំងក្នុងវិបត្តិនារយៈពេលប៉ុន្មានឆ្នាំមកនេះ។

វិធានការបន្ថូរបន្ថយនឹងចាប់ផ្ដើមអនុវត្តចាប់ពីថ្ងៃ ៣០ កញ្ញានេះតទៅ។ ទីក្រុងធំៗ២ នៅភាគខាងត្បូងរបស់ចិន រួមមានទីក្រុងក្វាងចូវ និងក្រុងសេនជិន ដែលមានប្រជាជនរស់នៅសរុបចូលគ្នា ៣៧ លាននាក់ បាននិយាយថា អ្នកទិញផ្ទះនឹងមិនរងការត្រួតពិនិត្យចំពោះសិទ្ធិផ្ទះរបស់ពួកគេទៀតនោះទេ។ ចំពោះទីក្រុង ក្វាងចូវ អាជ្ញាធរលែងកំណត់ឱ្យប្រជាជនម្នាក់អាចមានផ្ទះត្រឹមតែ១ខ្នងទៀតហើយ ដែលនេះមានន័យថា ពួកគេអាចទិញផ្ទះលើសពី១ខ្នងបាន។

ចំណែកឯទីក្រុងសៀងហៃ ដែលជាមជ្ឈមណ្ឌលសេដ្ឋកិច្ច និងជាទីក្រុងមានបំផុតរបស់ប្រទេសចិនវិញ បានប្រកាសថានឹងកាត់បន្ថយការបង់រំលោះអប្បបរមាលើផ្ទះមួយខ្នង មកត្រឹម ១៥ ភាគរយ ពី ២០ ភាគរយ។

បើតាមការចុះផ្សាយរបស់សារព័ត៌មានរដ្ឋចិន Xinhua ការបន្ធូរបន្ថយគោលការណ៍របស់បណ្ដាទីក្រុងធំៗទាំង៣ ធ្វើឡើងក្រោយពេលដែលធនាគារកណ្តាលរបស់ប្រទេសចិនកាលពីថ្ងៃអាទិត្យ បានប្រកាសថា ខ្លួននឹងស្នើឱ្យស្ថាប័នហិរញ្ញវត្ថុកាត់បន្ថយអត្រាការប្រាក់លើប្រាក់កម្ចីទិញផ្ទះដែលមានស្រាប់ ក្នុងគោលបំណងដើម្បី «កាត់បន្ថយបន្ទុកហិរញ្ញវត្ថុលើម្ចាស់អចលនទ្រព្យ»៕