ព័ត៌មានអន្ដរជាតិ

ក្រុមធុរកិច្ចថៃ ទាមទារឱ្យធនាគារកណ្ដាលកាត់បន្ថយអត្រាការប្រាក់ ដើម្បីជួយការនាំចេញ

បានផុស

៣ ម៉ោង មុន

នៅ

ថ្ងៃសុក្រ ៤ តុលា ២០២៤

ដោយ

ក្រុមធុរកិច្ចឈានមុខគេរបស់ប្រទេសថៃ បានអំពាវនាវឱ្យធនាគារកណ្ដាលកាត់បន្ថយអត្រាការប្រាក់ជាបន្ទាន់ ជុំវិញក្ដីបារម្ភពីកំណើនតម្លៃប្រាក់បាត ដែលបង្កផលប៉ះពាល់ជាអវិជ្ជមានដល់ការនាំចេញរបស់ប្រទេស។ នេះបើតាមការចុះផ្សាយរបស់កាសែត The Thaiger កាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគណៈកម្មាធិការអចិន្រ្តៃយ៍រួមស្តីពីពាណិជ្ជកម្ម ឧស្សាហកម្ម និងធនាគារ (JSCCIB) លោក Sanan Angubolkul បានគូសបញ្ជាក់ពីភាពបន្ទាន់ឱ្យធនាគារកណ្តាលថៃ (BoT) កែសម្រួលអត្រាការប្រាក់ ស្របតាមការអំពាវនាវឱ្យបន្ធូរបន្ថយគោលនយោបាយរូបិយវត្ថុម្តងហើយម្តងទៀតរបស់រដ្ឋាភិបាល។ លោក Sanan បាននិយាយថា ទីផ្សារកំពុងរំពឹងថានឹងមានការកាត់បន្ថយអត្រាការប្រាក់ ២៥ ពិន្ទុ (០,២៥ ភាគរយ) ជាមួយនឹងការកាត់បន្ថយជាបន្តបន្ទាប់ទៀតនៅឆ្នាំក្រោយ។

លោកថ្លែងយ៉ាងដូច្នេះថា៖ «ធនាគារកណ្ដាលថៃគួរកែសម្រួលអត្រាការប្រាក់ជាបន្ទាន់» ហើយកត់សម្គាល់ថា ភាពរឹងមាំរបស់ប្រាក់បាតធ្វើថៃពិបាកប្រកួតប្រជែងក្នុងការនាំចេញ ដែលជាវិស័យជំរុញកំណើនដ៏សំខាន់។

លោក Sanan បានបន្តថា៖ «ភាពរឹងមាំខ្លាំងនៃប្រាក់បាតថៃ កំពុងបង្កក្តីបារម្ភគ្រប់វិស័យ។ រដ្ឋាភិបាលអាចចាត់វិធានការមួយចំនួនដូចជាការជំរុញការនាំចេញដើម្បីជំរុញសេដ្ឋកិច្ច និងទាញយកប្រយោជន៍ឱ្យបានច្រើនបំផុតពីការតម្លៃប្រាក់បាតនាពេលបច្ចុប្បន្ន»។

គួរគូសបញ្ជាក់ថា ប្រាក់បាតបានឡើងដល់កម្រិតខ្ពស់បំផុតក្នុងរយៈពេល ៣១ ខែ ដោយជួញដូរក្នុងតម្លៃ ៣២,១២៥ បាត/ដុល្លារ។ រាប់តាំងពីដើមឆ្នាំមកទល់ពេលនេះ ប្រាក់បាតបានកើនឡើង ៥ ភាគរយ។

ការអំពាវនាវឱ្យមានការកាត់បន្ថយអត្រាការប្រាក់ ធ្វើឡើងនៅពេលដែលក្រសួងហិរញ្ញវត្ថុ និងធនាគារកណ្ដាលថៃ រៀបចំកិច្ចប្រជុំនៅសប្តាហ៍នេះ ដើម្បីពិភាក្សាអំពីទិសដៅអត្រាអតិផរណា និងបញ្ហានៃការឡើងថ្លៃប្រាក់បាត។ កាលពីខែសីហា ធនាគារកណ្ដាលបានរក្សាអត្រាការប្រាក់សំខាន់ៗនៅកម្រិតខ្ពស់មួយទសវត្សរ៍ ២,៥០ ភាគរយ ខណៈគណៈកម្មាធិកាត្រួតពិនិត្យអត្រាការប្រាក់ កំណត់នឹងជួបគ្នាម្តងទៀតនៅថ្ងៃទី ១៦ ខែតុលា។

ជុំវិញកង្វល់ពីការឡើងតម្លៃប្រាក់បាត ធនាគារកណ្ដាលបាននិយាយកាលពីចុងខែកញ្ញាថា ខ្លួនកំពុងគ្រប់គ្រងការប្រែប្រួលនៃប្រាក់បាត ដោយទទួលស្គាល់ថាការឡើងថ្លៃយ៉ាងឆាប់រហ័សនៃរូបិយប័ណ្ណនេះ កំពុងប៉ះពាល់ដល់ប្រាក់ចំណេញរបស់អ្នកនាំចេញ និងទេសចរណ៍ ដែលជាវិស័យជំរុញសេដ្ឋកិច្ចដ៏សំខាន់ៗ៕