ព័ត៌មានអន្ដរជាតិ

តម្លៃប្រេងបញ្ចប់ការជួញដូរក្នុងកំណើនប្រចាំសប្ដាហ៍ខ្ពស់បំផុតរយៈពេលជាង១ឆ្នាំ

បានផុស

៤ ខែ មុន

នៅ

ថ្ងៃសៅរ៍ ៥ តុលា ២០២៤

ដោយ

តម្លៃប្រេងបានកើនឡើងកាលពីថ្ងៃសុក្រ ដែលជាថ្ងៃបញ្ចប់ការជួញដូរប្រចាំសប្ដាហ៍ ដោយកត់ត្រាពីកំណើនប្រចាំសប្ដាហ៍ខ្ពស់បំផុតក្នុងរយៈពេលជាង១ឆ្នាំ ដោយសារតែភាពតានតឹងនៃជម្លោះនៅមជ្ឈិមបូព៌ា ទោះបីជាតម្លៃប្រចាំថ្ងៃកើនឡើងតិចតួចក្ដី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ នាថ្ងៃសៅរ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ៤៣ សេន ឬ ០,៦ ភាគរយ ដោយបញ្ចប់ការជួញដូរនៅតម្លៃ ៧៨,០៥ ដុល្លារ/បារ៉ែល ខណៈតម្លៃអនាគតប្រេងឆៅរបស់អាមេរិក ម៉ាក West Texas Intermediate (WTI) បានកើនឡើង ៦៧ សេន ឬ ០,៩ ភាគរយ ដោយបញ្ចប់ការជួញដូរនៅតម្លៃ ៧៤,៣៨ ដុល្លារ/បារ៉ែល។

ផ្អែកលើអត្រាប្រចាំសប្ដាហ៍ តម្លៃប្រេងម៉ាក Brent បានកើនឡើងជាង ៨ ភាគរយ ដែលជាកំណើនច្រើនបំផុត រាប់តាំងពីខែមករា ឆ្នាំ ២០២៣ ខណៈតម្លៃប្រេងម៉ាក WTI បានកើនឡើង ៩,១ ភាគរយ ក្នុងអត្រាប្រចាំសប្ដាហ៍ដូចគ្នា ដែលជាកំណើនធំបំផុតរាប់តាំងពីខែមីនា ឆ្នាំ ២០២៣។

កំណើនដ៏ធំនេះ កើតមានឡើងចំពេលដែលជម្លោះនៅមជ្ឈិមបូព៌ាកាន់តែតានតឹង ជុំវិញការវាយប្រហាររបស់អ៊ីរ៉ង់លើអ៊ីស្រាអែល ខណៈអ៊ីស្រាអែលប្ដេជ្ញាសងសឹក ចំពេលដែលសង្រ្គាមនៅហ្គាហ្សាជាមួយក្រុមហាម៉ាស់របស់ប៉ាឡេស្ទីន និងវិវាទជាមួយហេសប៊ូឡាហ៍របស់លីបង់នៅតែបន្ត។

កាលពីថ្ងៃព្រហស្បតិ៍ សន្ទស្សន៍តម្លៃប្រេងទាំង២ បានកើនឡើងជាង ៥ ភាគរយ បន្ទាប់ពីប្រធានាធិបតីអាមេរិក លោក ចូ បៃដិន បានបញ្ជាក់ថា សហរដ្ឋអាមេរិកកំពុងពិភាក្សាជាមួយអ៊ីស្រាអែលអំពីថាតើខ្លួននឹងគាំទ្រអ៊ីស្រាអែលចំពោះការវាយប្រហារលើហេដ្ឋារចនាសម្ព័ន្ធថាមពលរបស់អ៊ីរ៉ង់ដែរឬយ៉ាងណា៕