ក្រុមហ៊ុនអាកាសចរណ៍ IndiGo ឥណ្ឌា នឹងចាប់ផ្ដើម​ហោះហើរត្រង់មកកម្ពុជា នៅដើមឆ្នាំ ២០២៥

លោក កុយ គួង ឯកអគ្គរាជទូតកម្ពុជា ប្រចាំប្រទេសឥណ្ឌាបានឱ្យដឹងថា​ តាមគម្រោងក្រុមហ៊ុន​អាកាសចរណ៍ IndiGo របស់ឥណ្ឌា នឹងត្រៀមបើកការហោះហើរត្រង់ពីទីក្រុងញូវដេលី មករាជ​ធានី​ភ្នំពេញ និងទីក្រុង Kolkata មកខេត្តសៀមរាប នៅខែកុម្ភៈ ឆ្នាំ ២០២៥ ខាងមុខ។

បើគ្មានអ្វីប្រែប្រួលទេកម្មវិធីហោះហើររបស់ក្រុមហ៊ុនអាកាសចរណ៍ IndiGo របស់ឥណ្ឌា នឹងហោះហើរ​៧ជើងក្នុងមួយសប្តាហ៍។

ជើងហោះហើរត្រង់កម្ពុជា-ឥណ្ឌា បានចាប់ផ្ដើមបើកដំណើរការជាផ្លូវការកាលពីថ្ងៃទី ១៦ ខែមិថុនា ឆ្នាំ ២០២៤ ដោយក្រុមហ៊ុនអាកាសចរណ៍ Cambodia Angkor Air ដោយធ្វើឡើង ៤ ជើង ក្នុងមួយសប្ដាហ៍។

លោក ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ អាកាសចរណ៍ស៊ីវិលប្រាប់កម្ពុជាថ្មីថា ការតភ្ជាប់ជើង​ហោះហើរពីឥណ្ឌាមកកម្ពុជា ​នឹងផ្ដល់ផលចំណេញដល់ប្រទេសទាំងពីរ​ពាក់ព័ន្ធនឹង​ការធ្វើដំណើររយៈពេលខ្លី ហើយការចំណាយតិចជាងមុន ជាពិសេសភាគីទាំង​ពីរចង់ផ្សព្វផ្សាយពីផ្នែកទេសចរណ៍ វប្បធម៌ សាសនា និងសុខភាព ខណៈកម្ពុជាប្រើប្រាស់​សេវាសុខាភិបាលឥណ្ឌាច្រើន ខណៈឥណ្ឌាក៏ចង់មកស្រុកខ្មែរតាមរយៈទេសចរណ៍វប្បធម៌ និងសាសនា។

យោងតាមរដ្ឋលេខាធិការដ្ឋានអាកាសចរណ៍ស៊ីវិល នៅក្នុងឆមាសទី១ ឆ្នាំ ២០២៤ កម្ពុជាទទួលបានអ្នកដំណើរតាមជើងអាកាស ជាង ៣លាននាក់ (៣,០៣៦,៩៤៤ នាក់) ក្នុងនោះ អ្នកដំណើរអន្តរជាតិ(ក្រៅស្រុក) មានចំនួន ២,៨៨៤,៧៤៦​នាក់ (ទ្វេទិស) និងអ្នកដំណើរក្នុងស្រុក មានចំនួន ១៥២,១៩៨នាក់ (ទ្វេទិស)៕

អត្ថបទ៖ ឡេង ដេត