អ្នកជំនាញអះអាងថា ហាងឆេងមាសនៅបន្តស្ថិតក្នុងតម្លៃខ្ពស់

តម្លៃមាសតាមបណ្ដាហាងនានានៅក្នុងរាជធានីភ្នំពេញស្ថិតក្នុងរង្វង់ ៣២០ ដុល្លារ ក្នុងមួយជី ខណៈអ្នក​ជំនាញមើលឃើញថា ស្ថានភាពតម្លៃមាសមិនមានការហក់ឡើងឬចុះនោះទេ ប៉ុន្តែតម្លៃហាងឆេងមាស​កំពុង​​​​​​ស្ថិត​នៅក្នុងតម្លៃខ្ពស់នៅឡើយ។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities បាន​​ឱ្យដឹងនៅថ្ងៃទី ០៨ ខែតុលា ឆ្នាំ ២០២៤ នេះថា តម្លៃហាងឆេង​មាសបច្ចុប្បន្ន​ស្ថិតនៅ​ក្នុង​តម្លៃ​ខ្ពស់ គឺ ២៦៤៧ ដុល្លារ ក្នុងមួយអោន នៅលើទីផ្សារ​អន្តរជាតិ ឬស្មើនឹង ៣១៨៩ ដុល្លារ ក្នុង​មួយ​តម្លឹងនៅកម្ពុជា។

លោក ឡុង សំណាង បានឱ្យដឹងថា៖ «ស្ថានការណ៍ពុះកញ្ជ្រោលរវាងអ៊ីស្រាអែល ជាមួយមួយ​អ៊ីរ៉ង់ លែងមានការប៉ះពាល់ទៅដល់តម្លៃហាងឆេងមាសហើយ ប៉ុន្តែដំបូងឡើយពេល​មានសង្គ្រាម​វាអាចប៉ះពាល់ ប្រមាណ ២ សប្ដាហ៍ ក្រោយមកសង្គ្រាមរាំរៃ វាឈប់ប៉ះពាល់ហើយ បន្ទាប់​ពីអ្នក​វិនិយោគ​​អាចរៀបចំអាជីវកម្មរបស់ពួកគាត់រួចរាល់ ឬគាត់ចាកចេញពីតំបន់ដែលប៉ះពាល់»។

លោក ឡុង សំណាងបន្ថែមថា៖ « ខ្ញុំគិតថា នៅថ្ងៃទី ០៥ ខែ ១១ ការរៀបចំការបោះឆ្នោតនៅ​អាមេរិក ខាងមុខនេះ ប្រសិនបើជាប់លោក ដូណាល់ ត្រាំ តម្លៃហាងឆេងមាសនឹងធ្លាក់ចុះវិញ ប៉ុន្តែ​​មិនធ្លាក់​ខ្លាំងនោះទេ គឺនៅចន្លោះខ្ទង់ ៣ ពាន់ដុល្លារ ក្នុងមួយតម្លឹង»។

លោក ឡុង សំណាង បន្តថា ក្រោយបោះឆ្នោតនៅអាមេរិក ២ ថ្ងៃ មានព័ត៌មាន សម្រេចបន្ថយ​អត្រា​​​​ការប្រាក់ម្ដងទៀត ដែលនឹងធ្វើឱ្យលុយដុល្លារអាមេរិកចុះខ្សោយ ហើយទាញតម្លៃមាស​ឡើង​ត្រឡប់ទៅ​វិញ។

លោក ឡុង សំណាងបន្ថែ៖« ជាការមើលឃើញរបស់ខ្ញុំនៅ ថ្ងៃទី ០៥ ធ្លាក់ចុះ ថ្ងៃទី ០៧ ឡើងវិញ ហើយ​យើង​ក៏អាចមើលឃើញភូមិសាស្ត្រនយោបាយ ឬប្រធានស័ក្ដិមួយចំនួន ក្នុងពេល​បច្ចុប្បន្ន​នេះ វាអត់​ល្អ​ប្រ​សើរ​សម្រាប់តម្លៃហាងឆេងមាសទេ ដោយសាររដូវនេះ ប្រធានស័ក្ដិផ្សេងៗ វាអាច​កើត​​ឡើង​ច្រើន​ ធ្វើឱ្យតម្លៃហាងឆេងមាសមានការកើនឡើង»៕

អត្ថបទ៖ ឡេង ដេត