ព័ត៌មានអន្ដរជាតិ

OpenAI គ្រោងដាក់ការិយាល័យនៅសិង្ហបុរី ដើម្បីពង្រឹងប្រតិបត្តិការក្នុងតំបន់

បានផុស

៦ ខែ មុន

នៅ

ថ្ងៃពុធ ៩ តុលា ២០២៤

ដោយ

ក្រុមហ៊ុនបញ្ញាសិប្បនិម្មិត OpenAI ដែលជាក្រុមហ៊ុនមេរបស់ ChatGPT ដែលជាវេទិកាឆ្លើយឆ្លងសារស្វ័យប្រវត្តិដោយប្រើបញ្ញាសិប្បនិម្មិតបង្កើត (Generative AI) នឹងបើកការិយាល័យនៅអាស៊ីទី២របស់ខ្លួន ក្នុងប្រទេសសិង្ហបុរីនៅឆ្នាំ ២០២៤ នេះ។ នេះបើតាមការចុះផ្សាយរបស់សារព័ត៌មាន Straits Times នាថ្ងៃពុធនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យនៅសិង្ហបុរី ដែលជាសាខាអន្តរជាតិទី៤របស់ក្រុមហ៊ុន នឹងផ្តោតលើការជំរុញកិច្ចសហប្រតិបត្តិការក្នុងតំបន់ រួមទាំងការងារជាមួយកម្មវិធីបញ្ញាសិប្បនិម្មិតជាតិ AI Singapore លើគំរូ AI ជំនាន់ថ្មីៗ ដែលរចនាឡើងដើម្បីយល់ និងឆ្លុះបញ្ចាំងពីវប្បធម៌ និងភាសាក្នុងតំបន់អាស៊ីអាគ្នេយ៍។

ការពង្រីកខ្លួន OpenAI នៅសិង្ហបុរី បង្ហាញពីផែនការរយៈពេលវែងរបស់ក្រុមហ៊ុន AI យក្សអាមេរិកមួយនេះ ក្នុងទាញយកសក្តានុពលផ្នែកបច្ចេកវិទ្យាដែលកំពុងរីកចម្រើនរបស់សិង្ហបុរី និងធ្វើឱ្យប្រតិបត្តិការរបស់ខ្លួនកាន់តែស៊ីជម្រៅក្នុងតំបន់ ដោយដើរតួជាមជ្ឈមណ្ឌលសម្រាប់ដៃគូអាស៊ីប៉ាស៊ីហ្វិក (Apac) របស់ខ្លួន។

នាយកប្រតិបត្តិរបស់ OpenAI លោក Sam Altman បាននិយាយក្នុងសេចក្តីថ្លែងការណ៍ចេញផ្សាយនៅថ្ងៃពុធនេះថា៖ «សិង្ហបុរី ដែលមានប្រវត្តិសាស្រ្តដ៏សម្បូរបែបនៃការដឹកនាំផ្នែកបច្ចេកវិទ្យា បានលេចចេញជាអ្នកនាំមុខគេក្នុងវិស័យ AI ដោយមានសក្តានុពលដោះស្រាយបញ្ហាលំបាកបំផុតមួយចំនួនរបស់សង្គម និងជំរុញវិបុលភាពសេដ្ឋកិច្ចរបស់ខ្លួន»។ លោកបន្តថា៖ «យើងពិតជារំភើបក្នុងការចាប់ដៃគូជាមួយរដ្ឋាភិបាល និងប្រព័ន្ធអេកូឡូស៊ី AI ដែលកំពុងរីកចម្រើនរបស់ប្រទេសនេះ នៅពេលដែលយើងពង្រីកចូលទៅក្នុងតំបន់ Apac»។

គួរគូសបញ្ជាក់ថា ក្រុមហ៊ុន OpenAI ត្រូវបានបង្កើតឡើងក្នុងឆ្នាំ ២០១៥ ហើយបច្ចុប្បន្នមានការិយាល័យនៅទីក្រុងឡុងដ៍ (ចក្រភពអង់គ្លេស) ឌុលលីន (អៀរឡង់) និងតូក្យូ (ជប៉ុន)៕