ព័ត៌មានអន្ដរជាតិ

កំណើនសេដ្ឋកិច្ចវៀតណាម ចិន កូរ៉េខាងត្បូង អាចធ្លាក់ចុះ១ភាគរយ បើ ត្រាំ ជាប់ឆ្នោត

បានផុស

៥១ វិនាទី មុន

នៅ

ថ្ងៃចន្ទ ១៤ តុលា ២០២៤

ដោយ

ក្រុមហ៊ុនសិក្សាស្រាវជ្រាវ និងវាយតម្លៃ Fitch បាននិយាយក្នុងរបាយការណ៍របស់ខ្លួនចេញផ្សាយនាថ្ងៃចន្ទនេះថា កំណើនសេដ្ឋកិច្ចរបស់បណ្ដាប្រទេសនៅអាស៊ីមួយចំនួន រួមមានវៀតណាម ចិន និងកូរ៉េខាងត្បូង នឹងរងផលប៉ះពាល់យ៉ាងខ្លាំង ប្រសិនបើលោក ដូណាល់ ត្រាំ ជាប់ឆ្នោតក្លាយជាប្រធានាធិបតីសហរដ្ឋអាមេរិកជាលើកទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរ៉យទ័រ បានចុះផ្សាយពីការសិក្សារបស់ Fitch ដែលរកឃើញថា ក្រោមសេណារីយ៉ូករណីដ៏អាក្រក់បំផុត ផលិតផលក្នុងស្រុកសរុប (GDP) ក្នុងប្រទេសទាំង៣នៅឆ្នាំ ២០២៨ អាចទាបជាងការព្យាករនាពេលបច្ចុប្បន្នរហូតដល់ ១ ភាគរយ ឬច្រើនជាងនេះ នៅពេលសហរដ្ឋអាមេរិកពង្រឹងគោលនយោបាយពាណិជ្ជកម្មបែបការពារនិយមរបស់ខ្លួនឱ្យកាន់តែខ្លាំងថែមទៀត។

គោលនយោបាយការពារនិយម ដែលធ្វើឡើងដើម្បី «ការពារក្រុមហ៊ុនក្នុងស្រុកអាមេរិក» ជាក្ដីបារម្ភមួយសម្រាប់ប្រទេសនាំចេញទៅសហរដ្ឋអាមេរិកជាច្រើន។ ខណៈសហរដ្ឋអាមេរិកត្រៀមរៀបចំការបោះឆ្នោតប្រធានាធិបតីនាខែវិច្ឆិកាខាងមុខ លោក ត្រាំ ដែលកំពុងប្រកៀកប្រកិតគ្នាលើសន្ទុះគាំទ្រជាមួយគូប្រជែង បានបង្កើនវោហាសាស្រ្តរបស់ខ្លួន ជាពិសេសពាក់ព័ន្ធការតំឡើងពន្ធលើទំនិញនាំចូលពីបរទេស។

អតីតប្រធានាធិបតីដដែល បានបង្ហាញផែនការសម្រាប់ពន្ធចន្លោះពី ១០-២០ ភាគរយ លើទំនិញនាំចូលសហរដ្ឋអាមេរិកទាំងអស់ ក៏ដូចជាពន្ធ ៦០ ភាគរយ ឬច្រើនជាងនេះ លើទំនិញមកពីប្រទេសចិន។ ក្រុមហ៊ុន Fitch បាននិយាយថា ភាពតានតឹងពាណិជ្ជកម្មកាន់តែខ្លាំងឡើង អាចមានឥទ្ធិពលយ៉ាងខ្លាំងលើប្រទេស និងក្រុមហ៊ុនដែលនាំចេញទំនិញទៅសហរដ្ឋអាមេរិក៕