សេដ្ឋកិច្ច

អាកាសយានដ្ឋានអន្តរជាតិសៀមរាប ទទួលបានអ្នកដំណើរចេញ-ចូល ១ លាន ៣ សែននាក់

បានផុស

៥ ខែ មុន

នៅ

ថ្ងៃពុធ ១៦ តុលា ២០២៤

ដោយ

គិតចាប់តាំងពីថ្ងៃបើកដំណើរការ (១៦ តុលា ២០២៣-៣០ កញ្ញា ២០២៤) អាកាសយានដ្ឋានអន្តរជាតិសៀមរាបអង្គរទទួលបានអ្នកដំណើរចេញ-ចូលចំនួន ១ លាន ៣ សែននាក់ ហើយរំពឹងថា អ្នកដំណើរនឹងកើនដល់ ១ លាន ៥ សែន នាក់ នៅដំណាច់ឆ្នាំ ២០២៤។ នេះបើយោងតាមអាកាសយានដ្ឋានអន្តរជាតិសៀមរាបអង្គរ(SAI)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១៦ ខែតុលា ឆ្នាំ ២០២៤ នេះ លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអកាសចរណ៍ស៊ីវិល បានចូលរួមពិធីអបអរសាទរគម្រប់ខួប១ឆ្នាំនៃការដាក់ឱ្យប្រើប្រាស់អាកាសយានដ្ឋានអន្តរជាតិសៀមរាបអង្គរ (SAI) នៅខេត្តសៀមរាប ដោយមានការចូលរួមពីលោក Weng Wenbin ឯកអគ្គរដ្ឋទូតចិនប្រចាំកម្ពុជា លោក Liu Minglin អគ្គនាយកក្រុមហ៊ុនវិនិយោគ ខេត្តយុនណាន និងលោក ប្រាក់ សោភ័ណ អភិបាលខេត្តសៀមរាប។

លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអកាសចរណ៍ស៊ីវិលមានប្រសាសន៍ថា ការអភិវឌ្ឍន៍វិស័យអាកាសចរណ៍នៅតែជារបៀបវារៈនៃគោលនយោបាយរបស់រាជរដ្ឋាភិបាលកម្ពុជា ដើម្បីជំរុញការតភ្ជាប់ទីផ្សារក្នុងស្រុក និងអន្តរជាតិ ជំរុញវិស័យទេសចរណ៍ និងពាណិជ្ជកម្ម, ជំរុញកំណើនសេដ្ឋកិច្ច តាមរយៈការវិនិយោគបរទេស និងបង្កើតការងារ។

លោក ម៉ៅ ហាវណ្ណាល់ ថ្លែងថា អាកាសយានដ្ឋានអន្តរជាតិសៀមរាបអង្គរ បានចូលរួមចំណែកក្នុងការស្ដា និងអភិវឌ្ឍហេដ្ឋារចនាសម្ព័ន្ធអាកាសយានដ្ឋាននៅកម្ពុជា និងបានជំរុញកំណើនសេដ្ឋកិច្ចជាតិ លើកស្ទួយអាកាសចរណ៍ ទេសចរណ៍ និងវិនិយោគ។

លោក ម៉ៅ ហាវណ្ណាល់ អះអាងថា ខេត្តសៀមរាប នឹងក្លាយជាគោលដៅទេសចរណ៍ប្រកបដោយគុណភាព ភាពទាក់ទាញភ្ញៀវទេសចរអន្តរជាតិឱ្យបានប្រមាណ ៧,៥ លាននាក់ ភ្ញៀវទេសចរក្នុស្រុកប្រមាណ ១០ លាននាក់ ក្នុងមួយឆ្នាំ និងបង្កើតការងារ ១,៦ លាននាក់ និងនាំចំណូលសេដ្ឋកិច្ចជាតិប្រមាណ ៥,៩ ពាន់លានដុល្លារអាមេរិកនៅឆ្នាំ ២០៣៥។

យោងតាមរដ្ឋលេខាធិការដ្ឋានអាកាសចរណ៍ស៊ីវិល ចាប់តាំងពីបើកដំណើរការជិត ១ ឆ្នាំ (១៦ តុលា ២០២៣-៣០ កញ្ញា ២០២៤) អាកាសយានដ្ឋានអន្តរជាតិសៀមរាបអង្គរ ទទួលបានជើងហោះហើរចេញ-ចូល (ទ្វេទិស) ចំនួន ១៤ ៥៥៦ ជើង, អ្នកដំណើរចេញ-ចូល(ទ្វេទិស) ចំនួន ១,៣ លាននាក់ និងទំនិញតាមផ្លូវអាកាសជាង ៨២ តោន។

ដោយឡែកសម្រាប់រយៈពេល ៩ ខែ (មករា-កញ្ញា) ឆ្នាំ ២០២៤ អាកាសយានដ្ឋានអន្តរជាតិសៀមរាបអង្គរ មានជើងហោះហើរចេញ-ចូល ចំនួនជាង ១ ម៉ឺនជើង កើនឡើង ២៤%, អ្នកដំណើរចេញ-ចូល (ទ្វេទិស) មានជាង ៩៧ ម៉ឺននាក់ កើនឡើង ៣១% បើធៀបរយៈពេលដូចគ្នា នៅឆ្នាំ ២០២៣៕