ព័ត៌មានអន្ដរជាតិ

ទំនុកចិត្តឧស្សាហកម្មថៃប្រចាំខែកញ្ញា ធ្លាក់ចុះទាបបំផុតក្នុងរយៈពេល២ឆ្នាំ

បានផុស

១ នាទី មុន

នៅ

ថ្ងៃពុធ ១៦ តុលា ២០២៤

ដោយ

សហព័ន្ធឧស្សាហកម្មថៃ (FTI) បាននិយាយកាលពីថ្ងៃពុធថា សន្ទស្សន៍ទំនុកចិត្តឧស្សាហកម្មរបស់ប្រទេសថៃ បានធ្លាក់ចុះដល់កម្រិតទាបបំផុតក្នុងរយៈពេល ២៧ ខែ កាលពីខែកញ្ញា ដោយសារតែតម្រូវការក្នុងស្រុកខ្សោយ ទឹកជំនន់ និងភាពរឹងមាំនៃប្រាក់បាត។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមទិន្នន័យរបស់ FTI សន្ទស្សន៍ទំនុកចិត្តឧស្សាហកម្ម បានធ្លាក់ចុះដល់ ៨៧,១ ពិន្ទុ នៅខែកញ្ញា ពី ៨៧,៧ ពិន្ទុ នៅខែសីហា។ សហព័ន្ធបាននិយាយក្នុងសេចក្ដីថ្លែងការណ៍ថា អំណាចទិញបានចុះខ្សោយដោយសារកម្រិតបំណុលគ្រួសារខ្ពស់ ដែលកត្តានេះធ្វើឱ្យការលក់រថយន្តធ្លាក់ចុះ ខណៈធនាគារបន្តរឹតបន្តឹងលើការផ្តល់ប្រាក់កម្ចី។

FTI បាននិយាយថា ការកើនឡើងនៃប្រាក់បាតធៀបនឹងប្រាក់ដុល្លារអាមេរិក បានដាក់សម្ពាធលើក្រុមហ៊ុននាំចេញ ខណៈទំនិញនាំចូលពីប្រទេសចិនដែលមានតម្លៃថោកៗ ក៏បានជះឥទ្ធិពលដល់វិស័យផលិតកម្មរបស់ថៃផងដែរ។ ប្រាក់បាតបានឡើងថ្លៃ ២,៥ ភាគរយ ធៀបនឹងប្រាក់ដុល្លារ គិតមកទល់ពេលនេះឆ្នាំនេះ ដែលធ្វើឱ្យវាក្លាយជាប្រាក់រឹងមាំជាងគេទី២នៅអាស៊ី បន្ទាប់ពីប្រាក់រីងហ្គីត របស់ម៉ាឡេស៊ី។

ជាមួយគ្នានោះ FTI បាននិយាយថា ទឹកជំនន់នៅតាមតំបន់មួយចំនួននៃប្រទេសថៃ បានធ្វើឱ្យខូចខាតដល់វិស័យកសិកម្ម និងឧស្សាហកម្ម ក៏ដូចជាគោលដៅទេសចរណ៍ ដោយទាមទារឱ្យរដ្ឋាភិបាលគួរតែដាក់ចេញនូវវិធានការជំរុញសេដ្ឋកិច្ចបន្ថែមទៀត៕