កសិករឃុំជីរោទិ៍ ងាកមកចិញ្ចឹមកណ្ដូបលក់បង្កើនប្រាក់ចំណូល ដោះស្រាយជីវភាពគ្រួសារ

បន្ទាប់ពីការងារធ្វើស្រែចំការ កសិកររស់នៅក្នុងឃុំជីរោទ៍ទី១ ស្រុកត្បូងឃ្មុំ ខេត្តត្បូងឃ្មុំ បាននាំគ្នាចិញ្ចឹមកណ្តូបលក់ រកប្រាក់ចំណូលបន្ថែមដើម្បីផ្គត់ផ្គង់ជីវភាពគ្រួសារ ខណៈកណ្តូបមានទីផ្សារល្អ ងាយចិញ្ចឹម និងប្រើរយៈពេលខ្លីប្រមាណតែ ៣០ ថ្ងៃ។

លោក នៅ ចាន់ធី អ្នកចិញ្ចឹមកណ្ដូបនៅក្នុងភូមិរការធំ ឃុំជីរោទ៍ទី១ ស្រុក/ខេត្តត្បូងឃ្មុំ បានឲ្យដឹងថា នៅក្នុងឃុំជីរោទ៍ទី១ បាននាំគ្នាចិញ្ចឹមកណ្ដូបលក់ ជាមួយនឹងតម្លៃ ជិត៣ម៉ឺន រៀលក្នុង ១គីឡូក្រាម។ លោកថា កណ្តូបមិនពិបាកលក់ទេ ព្រោះមានម៉ូយគេចាំទទួលទិញយកទាំងអស់គេអាចយកទៅបំពងហូបធ្វើជាសាច់ខ្លែម ឬជាមួយបាយក៏បានដែរ មានរសជាតិឆ្ងាញ់ពិសារគុណភាពមិនចាញ់ចង្រិតឡើយ។

អ្នកស្រី មុំ រស់នៅភូមិ ឃុំ ជាមួយគ្នាដែរ បានចិញ្ចឹមកណ្តូបនេះរយៈពេល ៣ ខែមកហើយ ដោយទិញពូជពងកណ្ដូប​ពីបងស្រីរបស់គាត់ក្នុង ១ខាំតម្លៃ៥ម៉ឺនរៀល ១គីឡូក្រាមតម្លៃ ៥០ម៉ឺនរៀល ក្រោយមកបងស្រី បង្កាត់ភ្ញាស់ពងកណ្ដូបដោយខ្លួនឯងដើម្បីបន្តពូជរហូតមក។

អ្នកស្រីបន្តថា ដើម្បីងាយស្រួលចិញ្ចឹម យើងដាំស្មៅឲ្យវាស៉ីជាអាហារ ចិញ្ចឹមដាក់ក្នុងមុង ដែលក្នុង ១មុងអាចដាក់បាន ៣គីឡូក្រាមពង ហើយយើងប្រមូលផលវាបានមិនក្រោម ៧០គីឡូក្រាមឯណោះ។

គ្រួសារគាត់ចិញ្ចឹមបាន ៣មុងដែរ ទីផ្សារក្នុងស្រុកមិនពិបាកលក់សំខាន់ឲ្យតែយើងផលិតបាន ក្នុងនោះយើងអាចលក់​ពងពូជសម្រាប់ភ្ញាស់ក្នុង ១គីឡូក្រាមតម្លៃ ២៥ម៉ឺនរៀលទី ៣០ម៉ឺនរៀល ការចិញ្ចឹមកណ្ដូបលក់របស់កសិករយើងអាចដោះស្រាយជីវភាពគ្រួសារបាន។

លោក ទួន ឆៃលឹម ជាមេឃុំជីរោទិ៍ទី១ បានឲ្យដឹងថា នៅក្នុងឃុំមានភូមិចំនួន៩ភូមិ ហើយភូមិដែលចិញ្ចឹមកណ្តូបច្រើនជាងគេ មានចំនួន២ភូមិ គឺភូមិរកាធំ និងភូមិកំពង់ឫស្សី សរុបប្រមាណជាង១០០គ្រួសារ និងបណ្តាភូមិចំនួន៧ទៀត កសិករមានចំណាប់អារម្មណ៍ដែរ ហើយបាននាំគ្នាចិញ្ចឹមជាបន្តបន្ទាប់ដោយកណ្តូបជាសត្វងាយចិញ្ចឹមដើម្បីរកប្រាក់ចំណូលមកផ្គត់ផ្គង់គ្រួសារបន្ថែមទៀត៕

អត្ថបទ៖ សាន វិឡែម