ព័ត៌មានអន្ដរជាតិ

តម្លៃផ្ទះថ្មីនៅចិន ធ្លាក់ចុះលឿនបំផុត រាប់តាំងពីឆ្នាំ ២០១៥

បានផុស

៣៣ វិនាទី មុន

នៅ

ថ្ងៃសុក្រ ១៨ តុលា ២០២៤

ដោយ

ទិន្នន័យផ្លូវការពីរដ្ឋាភិបាលចិន បានបង្ហាញនៅថ្ងៃសុក្រថា តម្លៃផ្ទះថ្មីប្រចាំខែកញ្ញាក្នុងប្រទេសចិន បានធ្លាក់ចុះលឿនបំផុតរាប់ចាប់តាំងពីខែឧសភា ឆ្នាំ ២០១៥ ទោះបីជារដ្ឋាភិបាលបានបង្កើននូវកិច្ចខិតខំប្រឹងប្រែងជំរុញវិស័យអចលនទ្រព្យដែលជាប់គាំងក្ដី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រ៉យទ័របានវិភាគលើទិន្នន័យពីការិយាល័យស្ថិតិជាតិ (NBS) ដោយរកឃើញថា តម្លៃផ្ទះថ្មីបានធ្លាក់ចុះ ៥,៨ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលកាន់តែអាក្រក់ជាងការធ្លាក់ចុះ ៥,៣ ភាគរយ កាលពីខែសីហា។ វាគឺជាការធ្លាក់ចុះ ១៥ ខែ ជាប់ៗគ្នា។

ការជាប់គាំងនៃវិបត្តិអចលនទ្រព្យរបស់ចិន ដែលរួមចំណែកប្រមាណ ១/៤ នៃសកម្មភាពសេដ្ឋកិច្ច នៅតែជាបញ្ហាសេដ្ឋកិច្ចដ៏ធំរបស់ប្រទេស។

ក្នុងរយៈពេលប៉ុន្មានសប្តាហ៍ថ្មីៗនេះ ចិនបានណែនាំវិធានការជំរុញផ្សេងៗ រួមទាំងអត្រាការប្រាក់ទាប និងការបន្ធូរបន្ថយការរឹតបន្តឹងការទិញផ្ទះ ដែលជំរុញឱ្យមានតម្រូវការមួយចំនួនក្នុងទីក្រុងធំៗ៕