កម្ពុជារកប្រាក់ចំណូលបានជិត៤០០ លានដុល្លារពីការនាំចេញជ័រកៅស៊ូ​ក្នុងរយៈពេល ៩ ខែ​

អគ្គនាយកដ្ឋានកៅស៊ូ កម្ពុជារកប្រាក់ចំណូលចំនួន ៣៩៤ លានដុល្លារពីការនាំចេញជ័រកៅស៊ូធម្មជាតិក្នុងរយៈពេល ៩ ខែ​នៃឆ្នាំ ២០២៤ កើនឡើង ១៨ ភាគរយពីជិត ៣៣៣ លានដុល្លារក្នុងរយៈពេលដូចគ្នាកាលពីឆ្នាំមុន។

យោងតាមរបាយការណ៍របស់អគ្គនាយកដ្ឋានកៅស៊ូ កម្ពុជាបាននាំចេញទំនិញចំនួន ២៤៨ ៥៣៥ តោនក្នុងអំឡុងខែមករាដល់ខែកញ្ញាឆ្នាំនេះ កើនឡើង ២,៤ ភាគរយពីចំនួន ២៤២ ៦៥៤ តោនធៀបនឹងរយៈពេលដូចគ្នាកាលពីឆ្នាំមុន។

លោកគុណ កក្កដា អគ្គនាយកស្តីទីនៃអគ្គនាយកដ្ឋានកៅស៊ូ​បានលើកឡើងនៅក្នុងរបាយការណ៍ថា៖«ជ័រកៅស៊ូមួយតោនជាមធ្យមមានតម្លៃ ១ ៥៨៦ ក្នុងរយៈ៩ខែនៃឆ្នាំ ២០២៤នេះដែលកើនឡើងប្រហែល ២១៥ ដុល្លារខ្ពស់ជាងរយៈពេលដូចគ្នាកាលពីឆ្នាំមុន» ។

លោក ​ម៉ែន ​សុភក្តិ ​ប្រធាន​សមាគម​អភិវឌ្ឍន៍​កៅស៊ូ​កម្ពុជា​ប្រាប់កម្ពុជាថ្មីកាលពី ខែកក្កដា ឆ្នាំ ២០២៤ នេះថា ការប្រមូលផលជ័រកៅស៊ូយកមកកែច្នៃបានគ្រប់គ្រាន់ ខណៈកម្ពុជាកំពុង​មាន​កំណើនផ្ទៃដីចៀរជ័រកៅស៊ូបន្ថែម ដែលធ្វើឱ្យបរិមាណ​ប្រមូលផលកើនឡើងជាងមុន។

លោក ម៉ែន សុភក្ដិ ប្រាប់ថា តម្លៃកៅស៊ូនៅ​ក្នុងសប្ដាហ៍​នេះ បានធ្លាក់ចុះប្រមាណ ៥០ ដុល្លារ ប្រៀបនឹងសប្ដាហ៍មុន ដោយលក់ក្នុងតម្លៃជាង ១ ពាន់ ៦ រយ ដុល្លារ ក្នុងមួយតោន (ប្រភេទកៅស៊ូល្អ) ខណៈ​ជ័រ​កៅស៊ូ​ប្រភេទលេខ ១០ តម្លៃធ្លាក់ក្រោម ១ ពាន់ ៦ រយដុល្លារ។ លោក​បញ្ជាក់​ថា មូលហេតុដែលតម្លៃធ្លាក់ចុះ ដោយសារតម្រូវការ​ទីផ្សារ​បានធ្លាក់ចុះ តម្លៃកៅស៊ូក៏ធ្លាក់ចុះដែរ។

បើតាមអគ្គនាយកដ្ឋានកៅស៊ូ កម្ពុជានាំចេញផលិតផលកៅស៊ូធម្មជាតិជាចម្បងទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។

យោងតាមរបាយការណ៍ដដែល កម្ពុជាបានដាំដើមកៅស៊ូលើផ្ទៃដីសរុបចំនួន ៤០៧ ១៧២ ហិកតា ដែលក្នុងនោះមានប្រមាណ ៧៨,៦ ភាគរយអាចជៀជរ័បាន៕