ព័ត៌មានអន្ដរជាតិ

សហព័ន្ធឧស្សាហកម្មថៃ៖ SMEs ថៃកាន់តែច្រើន ធ្លាក់ក្នុងភាពមិនសូវស្រួលនៃសេដ្ឋកិច្ច

បានផុស

៥៥ វិនាទី មុន

នៅ

ថ្ងៃចន្ទ ២១ តុលា ២០២៤

ដោយ

សហព័ន្ធឧស្សាហកម្មថៃ (FTI) បានព្រមានថា សហគ្រាសធុនតូច និងមធ្យម (SMEs) កាន់តែច្រើន កំពុងជួបប្រទះការលំបាកផ្នែកហិរញ្ញវត្ថុដែលបណ្តាលមកពីបំណុល និងការធ្លាក់ចុះនៃការលក់ ខណៈកំណើនសេដ្ឋកិច្ចថៃបន្តដើរអូសជើង។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធបាននិយាយថា ចំនួនសហគ្រាសធុនតូច និងមធ្យមដែលមានភាពមិនសូវស្រួលផ្នែកសេដ្ឋកិច្ច ដោយសារវិធានការជំនួយរបស់រដ្ឋាភិបាលផ្សេងៗ រួមទាំងកាបូបឌីជីថល មិនទាន់ទទួលបានផ្លែផ្កានៅឡើយ ខណៈថ្មីៗនេះ ធនាគារកណ្ដាលថៃក៏បានបន្ធូរបន្ថយអត្រាការប្រាក់ ដែលរំពឹងថានឹងជួញសម្រួលដល់បន្ទុកហិរញ្ញវត្ថុ ជំរុញការវិនិយោគជាដើម។

FTI មិនបានបង្ហាញពីចំនួនសហគ្រាសធុនតូច និងមធ្យម ដែលកំពុងញាំញីដោយបញ្ហាបែបនេះទេ ខណៈបញ្ហាប្រឈមមានច្រើនផ្សេងទៀត រាប់តាំងពីកង្វះសាច់ប្រាក់ងាយស្រួល រហូតដល់ការលំបាកក្នុងការទទួលបានប្រភពហិរញ្ញវត្ថុ ចំពេលដែលស្ថាប័នហិរញ្ញវត្ថុ ក៏រឹតត្បឹតលើការផ្ដល់ប្រាក់កម្ចី។

ទោះជាយ៉ាងណាក៏ដោយ សហព័ន្ធធ្លាប់បាននិយាយថា រោងចក្រចំនួន ៦៦៧ បានបិទទ្វារនៅក្នុងឆមាសទី១ នៃឆ្នាំ ២០២៤ ដោយកើនឡើងខ្លាំង ប្រមាណ ៨៦,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។

អនុប្រធាន FTI លោក ML Peekthong Thongyai បាននិយាយថា ទស្សនវិស័យស្ថិតនៅក្នុងស្ថានភាពអាក្រក់សម្រាប់សហគ្រាសធុនតូច និងមធ្យម ដោយសារអំណាចទិញរបស់ប្រជាជនចុះខ្សោយ។ លោកបន្តថា ទឹកជំនន់ធ្ងន់ធ្ងរ ក៏រួមចំណែកជាបញ្ហាផងដែរ ដោយវាធ្វើឱ្យប្រជាជនសន្សំលុយទុក ដើម្បីជួសជុលផ្ទះ។

បើតាម FTI ទឹកជំនន់ដែលបានបំផ្លាញគ្រួសារ និងអាជីវកម្មនៅតំបន់ភាគខាងជើងរបស់ប្រទេស ដោយបណ្តាលឱ្យខូចខាតដល់សេដ្ឋកិច្ចចន្លោះពី ៣០-៥០ ប៊ីលានបាត តាមការប៉ាន់ស្មាន។ ជាមួយគ្នានោះ ទឹកជំនន់គឺជាកត្តាចម្បងដែលបណ្តាលឱ្យសន្ទស្សន៍ទំនុកចិត្តឧស្សាហកម្មថៃ ធ្លាក់ចុះពី ៨៧,៧ ពិន្ទុក្នុងខែសីហា មកត្រឹម ៨៧,១ ពិន្ទុ នៅខែកញ្ញា។ សន្ទស្សន៍ដដែល ឈរនៅ ៨៩,៣ ពិន្ទុ ក្នុងខែកក្កដា។

លើសពីបញ្ហានេះ លោក ML Peekthong បានឱ្យដឹងថា លំហូរនៃទំនិញថោកៗចិនចូលក្នុងទីផ្សារថៃ កំពុងបន្តប៉ះពាល់ដល់អាជីវកម្មក្នុងស្រុក រួមទាំងសហគ្រាសធុនតូច និងមធ្យមផងដែរ។

បញ្ហាទាំងនេះហើយ ទើប FTI អំពាវនាវឱ្យរដ្ឋាភិបាលថៃ ដាក់ចេញវិធានការបន្ថែមថ្មី ដើម្បីជួយដល់សហគ្រាសធុនតូច និងមធ្យម ដែលជាផ្នែកមួយជំរុញកំណើនសេដ្ឋកិច្ចរបស់ប្រទេស៕