ព័ត៌មានអន្ដរជាតិ

សេដ្ឋកិច្ចម៉ាឡេស៊ី ប៉ាន់ស្មានថាកើនឡើង ៥,៣ ភាគរយ នៅត្រីមាសទី៣

បានផុស

៤ ខែ មុន

នៅ

ថ្ងៃចន្ទ ២១ តុលា ២០២៤

ដោយ

នាយកដ្ឋានស្ថិតិម៉ាឡេស៊ី (DoSM) បានចុះផ្សាយពីការប៉ាន់ប្រមាណជាបឋមដែលបង្ហាញថា សេដ្ឋកិច្ចរបស់ម៉ាឡេស៊ីបានកើនឡើង ៥,៣ ភាគរយ ក្នុងត្រីមាសទី៣ នៃឆ្នាំ២០២៤ ទាបជាងកំណើន ៥,៩ ភាគរយ ក្នុងត្រីមាសទី២។ នេះបើតាមការចុះផ្សាយរបស់ទីភ្នាក់ងារសារព័ត៌មាន Bernama នាថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ប៉ាន់ស្មានជាបឋមស្ដីពីផលិតផលក្នុងស្រុកសរុប (GDP) របស់ខ្លួន នាយកដ្ឋានបានកត់សម្គាល់ថា GDP របស់ម៉ាឡេស៊ីបានកើនឡើង ៥,១ ភាគរយ សម្រាប់រយៈពេល ៩ ខែដើមឆ្នាំ ធៀបនឹងកំណើន ៣,៨ ភាគរយ ក្នុងរយៈពេលដូចគ្នាកាលពីឆ្នាំមុន។

ប្រធាននាយកដ្ឋានស្ថិតិ លោក Mohd Uzir Mahidin បាននិយាយក្នុងសេចក្តីថ្លែងការណ៍ថា៖ «ទីផ្សារការងារមានស្ថេរភាព សម្ពាធអតិផរណាមានកម្រិតមធ្យម គោលនយោបាយសារពើពន្ធ និងរូបិយវត្ថុ និងការងើបឡើងវិញជាបន្តបន្ទាប់នៃវិស័យទេសចរណ៍ បានរួមចំណែកដល់សន្ទុះនៃកំណើនសេដ្ឋកិច្ចក្នុងស្រុក»។

លោកបានកត់សម្គាល់ថា កំណើនសេដ្ឋកិច្ចនៅត្រីមាសទី៣ ជំរុញដោយវិស័យសេវាកម្មដែលកើនឡើង ៥,១ ភាគរយ ដែលនាំមុខដោយពាណិជ្ជកម្មលក់ដុំ និងរាយ ការដឹកជញ្ជូន និងសេវាកម្មអាជីវកម្មជាដើម។

លើសពីនេះ វិស័យផលិតកម្មបានកត់ត្រាពីកំណើន ៥,៧ ភាគរយ ដែលជំរុញជាចម្បងដោយផលិតផលអគ្គិសនី អេឡិចត្រូនិក និងអុបទិក ព្រមទាំងផលិតផលប្រេង គីមី កៅស៊ូ និងប្លាស្ទិក។ វិស័យសំណង់ ក៏កើនឡើងប្រមាណ ១៩,៥ ភាគរយ ផងដែរ ខណៈវិស័យកសិកម្មមានកម្សោយ ក្នុងអត្រាកំណើនត្រឹមតែ ៤ ភាគរយ៕