ព័ត៌មានអន្ដរជាតិ
ការអភិវឌ្ឍទីក្រុងថ្មីរបស់ឥណ្ឌូណេស៊ី ធ្វើឱ្យសេដ្ឋកិច្ចកាលីម៉ាន់តាន់ខាងកើតកើនឡើង
ការអភិវឌ្ឍរដ្ឋធានីថ្មីរបស់ឥណ្ឌូណេស៊ី នៅលើខេត្តកាលីម៉ាន់តាន់ខាងកើតនៃកោះបរនេអូ ដែលផ្ដួចផ្ដើមឡើងដោយលោកអតីតប្រធានាធិបតី ចូកូ វីដូដូ ក្នុងឆ្នាំ ២០២២ បានធ្វើឱ្យសេដ្ឋកិច្ចរបស់ខេត្តនេះ កើនឡើងនៅឆ្នាំ ២០២៣ លើសអត្រាកំណើនថ្នាក់ជាតិ។ នេះបើតាមការចុះផ្សាយរបស់កាសែត Jakarta Globe កាលពីចុងសប្ដាហ៍។
ទិន្នន័យដែល Jakarta Globe បានចុះផ្សាយបានបង្ហាញថា សេដ្ឋកិច្ចរបស់ខេត្តកាលីម៉ាន់តាន់ខាងកើត បានកើនឡើងដល់ ៦,២២ ភាគរយ នៅឆ្នាំ ២០២៣ ពី ៤,៤៨ ភាគរយ នៅឆ្នាំ ២០២២ ដោយលើសអត្រាកំណើនថ្នាក់ជាតិប្រចាំឆ្នាំ ៥,០៥ ភាគរយ។ កំណើនបន្តមកត្រីមាសទី១ឆ្នាំ ២០២៤ ដោយឈានដល់ ៧,២៦ ភាគរយ ដែលវាជាកម្រិតខ្ពស់បំផុតរាប់តាំងពីឆ្នាំ ២០១៣។
តំណាងមកពីការិយាល័យនៃធនាគារកណ្ដាលឥណ្ឌូណេស៊ី ប្រចាំខេត្តកាលីម៉ាន់តាន់ខាងកើត លោក Budi Widihartanto បាននិយាយថា កំណើននេះត្រូវបានជំរុញដោយតម្រូវការខ្លាំងក្នុងវិស័យដូចជាការជីកយករ៉ែ និងសំណង់ ដែលជំរុញបន្ថែមដោយការអភិវឌ្ឍន៍មូលធនដែលកំពុងបន្ត។
លោកបាននិយាយបន្តថា គម្រោងហេដ្ឋារចនាសម្ព័ន្ធ ដូចជាព្រលានយន្តហោះថ្មី និងមជ្ឈមណ្ឌលសេដ្ឋកិច្ចនៅជុំវិញទីក្រុងនូសានតារ៉ា (Nusantara) ដែលជារដ្ឋធានីថ្មី កំពុងជំរុញការចំណាយរបស់រដ្ឋាភិបាលកណ្តាល និងថ្នាក់មូលដ្ឋាន។
លោក Budi ក៏បានចង្អុលបង្ហាញផងដែរថា សកម្មភាពសេដ្ឋកិច្ចរបស់សហគមន៍ក្នុងតំបន់ កំពុងទទួលបានអត្ថប្រយោជន៍ ជាពិសេសតាមរយៈការកើនឡើងនៃសហគ្រាសខ្នាតតូច និងមធ្យម (SMEs)។ ក្នុងឆ្នាំ ២០២៣ វិស័យពាណិជ្ជកម្មរបស់ខេត្តកាលីម៉ាន់តាន់ បានកើនឡើង ៦,៨៥ ភាគរយ ដែលជាកំណើនខ្ពស់បំផុតរាប់ចាប់តាំងពីវិបត្តិកូវីដ១៩។
ជាមួយគ្នានេះ ប្រធានទីភ្នាក់ងារស្ថិតិកណ្តាល (BPS) ប្រចាំខេត្តកាលីម៉ាន់តាន់ខាងកើត លោកស្រី Yusniar Juliana បានសង្កត់ធ្ងន់ថា កំណើនក្នុងតំបន់ត្រូវបានជំរុញដោយផ្នែករដ្ឋបាលរដ្ឋាភិបាល ការពារជាតិ និងសន្តិសុខសង្គម ដែលបានកើនឡើង ១៧,៤៤ ភាគរយ។
ការអភិវឌ្ឍន៍ក្រុងនូសានតារ៉ា ក៏បានជះឥទ្ធិពលជាវិជ្ជមានដល់វិស័យទេសចរណ៍ផងដែរ ដោយអត្រាស្នាក់នៅសណ្ឋាគារក្នុងខេត្តនេះ បានឈានដល់ ៦៧ ភាគរយ នៅខែសីហា ឆ្នាំ ២០២៤ ដែលធ្វើឱ្យខេត្តនេះឈរនៅតែពីក្រុងកោះបាលីប៉ុណ្ណោះ លើអត្រានេះ៕
-
ព័ត៌មានអន្ដរជាតិ៤ ថ្ងៃ ago
អ្នកជំនាញព្រមានឲ្យវៀតណាម ត្រៀមខ្លួនទទួលកំពូលព្យុះទីហ្វុង ខែក្រោយ
-
សន្តិសុខសង្គម៦ ថ្ងៃ ago
នគរបាលបញ្ជូនលោក ដួង តារា ទៅឃុំខ្លួននៅពន្ធនាគារប៉េហ្សុី
-
ជីវិតកម្សាន្ដ៦ ថ្ងៃ ago
ភឹម ស្រីណូ ត្រូវអ្នកលេងបណ្ដាញសង្គមថៃតាមវាយប្រហារ ក្នុងនោះក៏មានបវរកញ្ញាថៃឆ្នាំ ២០២០ ផងដែរ
-
ព័ត៌មានអន្ដរជាតិ១ សប្តាហ៍ ago
ផ្កាយដុះកន្ទុយ បង្ហាញខ្លួននៅប្រទេស ថៃ
-
ព័ត៌មានអន្ដរជាតិ៣ ថ្ងៃ ago
ប្រព័ន្ធធ្វើចលនាទឹកជុំវិញផែនដីបានបាត់បង់តុល្យភាពជាលើកដំបូងក្នុងប្រវត្តិសាស្ត្រមនុស្សជាតិ
-
កីឡា៨ ម៉ោង ago
ម្ចាស់មេដាយទាំងអស់ក្នុងការប្រកួតយុទ្ធគុនចម្រុះខ្មែរបុរាណ ពានរង្វាន់សម្តេចធិបតី
-
ព័ត៌មានជាតិ១០ ម៉ោង ago
ខ្យល់មូសុងឦសាន និងសម្ពាធទាបបន្តជះឥទ្ធិពលលើកម្ពុជាដល់ថ្ងៃទី២៣តុលា
-
ជីវិតកម្សាន្ដ៤ ថ្ងៃ ago
មិនមែនជាការស្លាប់ធម្មតា ប៉ូលីសបានរកឃើញថ្នាំជាច្រើន ក្នុងបន្ទប់ Liam ដែលមានភាពរញ៉េរញ៉ៃ