ព័ត៌មានជាតិ

CSX៖ ពុំមានក្រុមហ៊ុនចុះបញ្ជីទៀតនោះទេរហូតដល់ចុងឆ្នាំនេះ

បានផុស

៤ ខែ មុន

នៅ

ថ្ងៃអង្គារ ២២ តុលា ២០២៤

ដោយ

លោក ហុង សុហួរ អគ្គនាយកនៃផ្សារមូលបត្រកម្ពុជា (CSX) បានលើកឡើងថា ខ្លួននឹងពុំមានក្រុមហ៊ុនចុះបញ្ជីរហូតដល់ដំណាច់ឆ្នាំនេះទៅតាមការគ្រោងទុកនោះឡើយ ដោយសារតែការរៀបចំខ្លួនរបស់ក្រុមហ៊ុនដែលមានផែនការបោះផ្សាយពុំទាន់រៀបចំខ្លួនរួចរាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងមកលោក ហុង សុហួរបានថ្លែងមកកាន់កម្ពុជាថ្មីថា ខ្លួននឹងមានក្រុមហ៊ុន២ឬ៣នឹងធ្វើការបោះផ្សាយទាំងមូលបត្រកម្មសិទ្ធិ និងសញ្ញាបណ្ណនៅចុងឆ្នាំនេះ ប៉ុន្តែលោកបានថ្លែងមកកាន់កម្ពុជាថ្មីនៅថ្ងៃទី២២ខែតុលានេះថាដោយសារតែការៀបចំពុំទាន់រួចរាល់ជាមូលហេតុធ្វើឱ្យបណ្តាក្រុមហ៊ុនទាំងនោះពុំទាន់ដាក់ពាក្យចុះបញ្ជីជាផ្លូវការមកកាន់ផ្សារមូលបត្រកម្ពុជា។

លោកបានថ្លែងថា៖«ខ្ញុំគិតថាមកដល់ដំណាច់ឆ្នាំនេះយើងមិនរំពឹងថានឹងមានក្រុមហ៊ុន២ឬ៣ដូចដែលយើងគ្រោងទុកអាចរៀបចំខ្លួនទាន់ក្នុងការបោះផ្សាយឡើយ ដោយសារតែមកទាល់ពេលនេះពួកគេពុំទាន់ដាក់ឯកសារសុំចុះបញ្ជីផ្លូវការនៅឡើយទេ។ ខ្ញុំគិតថាពួកគាត់បានកំពុងធ្វើការជាមួយក្រុមហ៊ុនធានាទិញមូលបត្រ (Underwriters) ក្នុងការរៀបចំខ្លួនអោយបានរួចរាល់ បើទោះបីជាមានការធ្វើការជាមួយគ្នាបណ្តើរៗពាក់ព័ន្ធនឹងព័ត៌មានក្រុមហ៊ុនត្រួសៗ ប៉ុន្តែវាពុំទាន់ជាឯកសារផ្លូវការចុងក្រោយនៅឡើយ»។

បើយោងតាម CSX គិតត្រឹមចុងខែធ្នូ ឆ្នាំ ២០២៣ មានក្រុមហ៊ុនចុះបញ្ជីចំនួន ២២ ដែលរួមក្រុមហ៊ុន១១ ចុះបញ្ជីមូលបត្រកម្មសិទ្ធ និងក្រុមហ៊ុនចំនួន ១១ ចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ២២ នេះបានប្រមូលមូលនិធិសរុបប្រមាណ ៣៥៩ លានដុល្លារពីទីផ្សារមូលធន។ ទន្ទឹមនឹងនេះដែរ គិតត្រឹមខែវិច្ឆិកា ឆ្នាំ ២០២៣ ទំហំជួញដូរប្រចាំថ្ងៃជាមធ្យមមានប្រមាណ ១៣០ ០០០ ភាគហ៊ុន ដែលមានតម្លៃជួញដូរប្រចាំថ្ងៃជាមធ្យមប្រហែល ២១០ ០០០ដុល្លារ។

លោកហុង សុហួរថ្លែងថា៖ «ចំនួនគណនីជួញដូរបានបង្ហាញពីកំណើនយ៉ាងខ្លាំង ដែលកើនឡើងពីប្រមាណ ៣៥០០០ គណនីដល់ ៤៧ ០០០ គណនី។ មហិច្ឆតារបស់ CSX នឹងឈានដល់ចំនួនគណនីជួញដូររហូតដល់ ១០០ ០០០ គណនីនៅឆ្នាំ ២០២៤ ជាមួយនឹងតម្លៃជួញដូរប្រចាំថ្ងៃជាមធ្យម ១០០ លានដុល្លារត្រឹមឆ្នាំ ២០៣០»៕

Related Topics:ផ្សារមូលបត្រ