សេដ្ឋកិច្ច

អាមេរិកគាំទ្រផែនការចរចាររវាងកម្ពុជា-ថៃ ក្នុងការរុករកប្រេងក្នុងតំបន់សមុទ្រ

បានផុស

១ ថ្ងៃ មុន

នៅ

ថ្ងៃអង្គារ ២២ តុលា ២០២៤

ដោយ

ថ្នាក់ដឹកនាំអាមេរិកបានគាំទ្រផែនការចរចារលើការរុករកប្រេង និងឧស្ម័នក្នុងតំបន់ឧស្ម័នប្រេងត្រួតស៊ីគ្នារវាងកម្ពុជា-ថៃ (OCA)ដើម្បីបម្រើជាប្រយោជន៍សេដ្ឋកិច្ចនៃប្រទេសទាំងពីរ។

ការជំរុញការគាំទ្របានធ្វើឡើងក្នុងពេល ឧបការីរដ្ឋមន្ត្រីក្រសួងការបរទេស និងក្រសួងថាមពលអាមេរិក លោក Geoffrey R. Pyatt និងលោក Andrew Light បានជួបសន្ទនាទ្វេភាគីជាមួយលោក កែវ រតនៈ រដ្ឋមន្ត្រីក្រសួងរ៉ែ និងថាមពល នៅសឹង្ហបុរី ស្តីពីនិន្នាការសន្តិសុខថាមពលអាស៊ាន លទ្ធភាពសហការជាមួយវិស័យថាមពលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនោះ ក៏បានពិភាក្សាលើការជំរុញគាំទ្ររបស់អាមេរិកដល់ផែនការចរចារលើការរុករកប្រេង និងឧស្ម័នក្នុងតំបន់សមុទ្រជាប់ប្រទេសថៃ និងតួនាទីនាំមុខរបស់សឹង្ហបុរី និងកម្ពុជាក្នុងការប្រឹងប្រែងបង្កើតបណ្តាញអគ្គិសនីអាស៊ានឱ្យបានមុនឆ្នាំ២០៣៥ ខាងមុខ ក្នុងគោលដៅបង្កើនការប្រើប្រាស់ថាមពលបៃតង និងគ្រប់គ្រងថ្លៃអគ្គិសនីក្នុងតំបន់ប្រកបដោយប្រសិទ្ធភាព ជាជាងបណ្តាញដោយឡែកៗតាមប្រទេសនីមួយៗក្នុងពេលបច្ចុប្បន្ន។

កាលពីថ្ងៃទី១០ ខែតុលាឆ្នាំ២០២៤កាសែតបាងកកប៉ុស្តិ៍ថៃ បានចុះផ្សាយនាថ្ងៃព្រហស្បតិ៍នេះដោយស្រង់សម្ដីរបស់លោកស្រីនាយករដ្ឋមន្រ្តីថៃ ផែតងតាន ស៊ីណាវ៉ាត្រា ដែលបាននិយាយថា ការចរចាជាមួយភាគីកម្ពុជាលើការរុករកប្រេងរួមគ្នាលើតំបន់ត្រួតស៊ីគ្នាក្នុងឈូងសមុទ្រថៃ គឺជា «អាទិភាពបន្ទាន់១ក្នុងចំណោម១០» របស់រដ្ឋាភិបាលថ្មី។

ការកំណត់អទិភាពបែបនេះ ធ្វើឡើងចំពេលដែលរដ្ឋាភិបាលដឹកនាំគណបក្សភឿថៃរបស់លោកស្រី ប្ដេជ្ញាបង្កើនទុនបំរុងថាមពលដែលធ្លាក់ចុះ ដើម្បីទប់ទល់នឹងការឡើងថ្លៃថាមពល និងការនាំចូលច្រើននៃប្រេងឥន្ធនៈ ដោយសារតែការណ៍ដែលថា ការប្រែប្រួលនៃតម្លៃប្រេងសកល ជាពិសេសជុំវិញជម្លោះភូមិសាស្រ្តនយោបាយ ធ្វើឱ្យថៃងាយរងគ្រោះ ព្រោះប្រទេសនេះត្រូវពឹងផ្អែកខ្លាំងលើការនាំចូលថាមពល។

កាសែតបាងកកប៉ុស្តិ៍បានផ្សាយយ៉ាងដូច្នេះថា៖ «រដ្ឋាភិបាលចម្រុះដែលដឹកនាំដោយគណបក្សភឿថៃ នឹងចាប់ផ្តើមការចរចាឡើងវិញជាមួយកម្ពុជា ដើម្បីរុករកអណ្តូងប្រេង និងឧស្ម័ននៅឈូងសមុទ្រ(ថៃ) ដែលមានធនធាននេះក្រោមដី គិតជាទឹកប្រាក់ យ៉ាងតិច ៣០០ ប៊ីលានដុល្លារ ខណៈប្រទេសទាំង២មានជម្លោះដណ្ដើមគ្នាតាំងតែពីទសវត្សរ៍ឆ្នាំ ១៩៧០»។

គួរបញ្ជាក់ថា ភាគីទាំង២នាពេលកន្លងមកបានបង្ហាញចេតនាលើការចរចាគ្នាឡើងវិញ ក្រោយត្រូវបានជាប់គាំងតាំងពីឆ្នាំ ២០០១។ យ៉ាងណាមិញ ជាថ្មីម្ដងទៀត កាសែតបាងកកប៉ុស្ត៍ មិនបានផ្សាយជាលម្អិតថា លោកស្រី ផែតងតាន បានបញ្ចាក់លើការចរចាជាថ្មីនេះ កាលពីពេលណា ឬបែបណានោះទេ៕