ក្រសួង​ច្រានចោលនូវការចុះផ្សាយអំពីការយល់ព្រមចូលរួមគំនិតផ្តួចផ្តើម ” Six countries, One Destination ”

ក្រសួងទេសចរណ៍បានធ្វើការបដិសេដនូវការចុះផ្សាយរបស់សារព័ត៌មានជាតិនិងអន្តរជាតិដែលថាកម្ពុជាយល់ព្រមលើសំណើររបស់ភាគីថៃ​លើគំនិតផ្តួចផ្តើម ” Six countries, One Destination ”នាពេលថ្មីៗនេះ។

យោងតាមសេចក្តីបំភ្លឺរបស់ក្រសួងចុះថ្ងៃទី២២ ខែតុលាលើកឡើងថាក្រសួងទេចរណ៍ សូមជម្រាបជូនសាធារណជន និងសារព័ត៌មានជាតិនិងអន្តរជាតិទាំងអស់ឱ្យបាន ជ្រាបថា នៅថ្ងៃទី២២ ខែតុលា ឆ្នាំ២០២៤ មានសារព័ត៌មានមួយចំនួនបានផ្សព្វផ្សាយអំពីជំហរគាំទ្ររបស់ កម្ពុជាលើគំនិតផ្តួចផ្តើម ” Six countries, One Destination ” ដែលបានលើកឡើងដោយព្រះរាជាណាចក្រថៃ ក្នុងឱកាសដែល ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានទទួលជួបសំដែងការគួរសម និងពិភាក្សា ការងារជាមួយឯកឧត្តម Dusit MANAPAN ទីប្រឹក្សារដ្ឋមន្ត្រីក្រសួងការបរទេសថៃ និងគណៈប្រតិភូ កាលពី ថ្ងៃទី២១ ខែតុលា ឆ្នាំ២០២៤ នៅទីស្តីការក្រសួងទេសចរណ៍។

ក្រសួងថា៖«ពាក់ព័ន្ធនឹងការផ្សព្វផ្សាយខាងលើ ក្រសួងទេសចរណ៍ សូមធ្វើការបញ្ជាក់ជូនសាធារណជន និង សារព័ត៌មានជាតិនិងអន្តរជាតិទាំងអស់ជ្រាបថា នៅក្នុងជំនួបខាងលើ ក្រសួងទេសចរណ៍ បានបញ្ជាក់ទៅភាគីថៃ ថាក្រសួងសូមធ្វើការកត់សម្គាល់លើគំនិតផ្តួចផ្តើម “ Six countries, One Destination និងស្នើសុំភាគីថៃផ្តល់ ឯកសារទស្សនទានដែលគ្រប់ជ្រុងជ្រោយ និងឯកសារពាក់ព័ន្ធនឹងគំនិតផ្តួចផ្តើមនេះតាមផ្លូវការទូត ដូចមាន បញ្ជាក់ក្នុងលិខិតផ្លូវការរបស់ក្រសួងទេសចរណ៍ លេខ១៦៣ MOT ចុះថ្ងៃទី២២ ខែតុលា ឆ្នាំ២០២៤ ផ្ញើជូន ស្ថានឯកអគ្គរាជទូតនៃព្រះរាជាណាចក្រថៃប្រចាំនៅកម្ពុជា»។

«ក្នុងន័យនេះ ក្រសួងទេសចរណ៍ ស្នើឱ្យសារព័ត៌មានជាតិ និងអន្តរជាតិ សូមកែតម្រូវ និងបញ្ឈប់រាល់ ការផ្សាយព័ត៌មានដែលប្រាសចាកពីជំហរពិតប្រាកដរបស់ក្រសួងទេសចរណ៍ ដែលអាចបណ្តាលឱ្យមានការ ភាន់ច្រឡំដោយប្រការណាមួយជាយថាហេតុ»។នេះបើយោងក្រសួង។

បើយោងតាមសារព័ត៌មានថៃ Pataya Mail ចុះផ្សាយនៅថ្ងៃទី២២ខែតុលាគំនិត​ផ្ដួចផ្ដើមនេះរួមមានប្រទេសទាំង៦គឺ​ប្រទេស​ប្រ៊ុយណេ កម្ពុជា ឡាវ ម៉ាឡេស៊ី វៀតណាម និង​ថៃ។ ​

កាលពីឆ្នាំមុន ប្រទេសអាស៊ីអាគ្នេយ៍ទាំង៦នេះបានស្វាគមន៍ភ្ញៀវទេសចរបរទេសចំនួន ៧០លាននាក់។ នេះបើយោងតាមទិន្នន័យផ្លូវការរបស់រដ្ឋាភិបាល៕