ព័ត៌មានអន្ដរជាតិ

សិង្ហបុរីនឹងផ្តល់អាជ្ញាប័ណ្ណ ៣០ ឆ្នាំ លើការនាំចូលថាមពលបញ្ចេញកាបូនតិច

បានផុស

៣ ខែ មុន

នៅ

ថ្ងៃពុធ ២៣ តុលា ២០២៤

ដោយ

ប្រធាននិយតករថាមពលរបស់សិង្ហបុរី បានឱ្យដឹងនៅថ្ងៃពុធនេះថា ប្រទេសសិង្ហបុរីបានត្រៀមផ្តល់អាជ្ញាប័ណ្ណនាំចូលរយៈពេល ៣០ ឆ្នាំ ដល់ក្រុមហ៊ុនដែលវិនិយោគរាប់ពាន់លានដុល្លារក្នុងគម្រោងថាមពលបញ្ចេញកាបូនតិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកប្រតិបត្តិនៃអាជ្ញាធរទីផ្សារថាមពលសិង្ហបុរី លោក Puah Kok Keong បានថ្លែងក្នុងវេទិកាសប្ដាហ៍ថាមពលអន្តរជាតិសិង្ហបុរី ថា៖ «វានឹងត្រូវចំណាយប្រាក់អស់រាប់ពាន់លានដុល្លារ ដើម្បីបង្កើតស្ថានីយផលិតអគ្គិសនីពីថាមពលពន្លឺព្រះអាទិត្យ និងអង្គផ្ទុកថាមពលដ៏ធំៗទាំងនេះ ឱ្យត្រូវនឹងការផ្គត់ផ្គង់ថាមពល»។ លោកបានបន្ថែមថា ការពង្រាយបណ្ដាញខ្សែកាបថាមពលដើម្បីតភ្ជាប់សិង្ហបុរីជាមួយប្រទេសផ្សេងទៀត ក៏នឹងត្រូវចំណាយប្រាក់ច្រើនផងដែរ។

លោក Puah បានថ្លែងបន្តថា៖ «ពីភាគីសិង្ហបុរី យើងបានរៀបចំផ្តល់អាជ្ញាប័ណ្ណនាំចូលរយៈពេលវែងសមរម្យ គឺរយៈពេល ៣០ ឆ្នាំ សម្រាប់ក្រុមហ៊ុនដែលបានវិនិយោគក្នុងគម្រោងនេះ ពីព្រោះយើងយល់ពីការវិនិយោគជាមុនខ្ពស់ និងពេលវេលាដែលត្រូវការ ដើម្បីទាញយកដើមទុនរបស់អ្នកមកវិញ»។

គួរគូសបញ្ជាក់ថា សិង្ហបុរីមានផែនការនាំចូលអគ្គិសនីបញ្ចេញកាបូនតិចចំនួន ៦ ជីហ្គាវ៉ាត់ (GW) នៅឆ្នាំ ២០៣៥ ហើយកន្លងមក បានផ្តល់ការអនុម័តតាមលក្ខខណ្ឌសម្រាប់គម្រោងចំនួន ១០ នៅក្នុងប្រទេសអូស្ត្រាលី កម្ពុជា ឥណ្ឌូណេស៊ី និងវៀតណាម៕