ព័ត៌មានអន្ដរជាតិ

ក្រុមហ៊ុនផលិតស៊ីម៉ងត៍វៀតណាម ដំឡើងថ្លៃផលិតផល ដោយសារថ្លៃដើមផលិតកើនខ្ពស់

បានផុស

៥ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

ក្រុមហ៊ុនផលិតស៊ីម៉ងត៍ធំៗក្នុងស្រុកវៀតណាម បានប្រកាសពីការដំឡើងថ្លៃផលិតផលរបស់ខ្លួនចាប់ពីថ្ងៃទី ២០ ខែតុលា តទៅ ដើម្បីឆ្លើយតបនឹងការកើនឡើងនៃថ្លៃផលិតកម្ម ដែលជំរុញដោយតម្លៃអគ្គិសនី ធ្យូងថ្ម និងការវេចខ្ចប់ ដែលខ្ពស់ជាងមុន។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនផលិតស៊ីម៉ងត៍ទាំងនោះ រួមមានទាំងក្រុមហ៊ុន Vicem Bỉm Sơn ក្រុមហ៊ុន Bút Sơn ក្រុមហ៊ុន The Vissai ក្រុមហ៊ុន Thành Thắng Group និងក្រុមហ៊ុន Xuân Thành Cement ជាដើម។ អតិថិជនរបស់ក្រុមហ៊ុន នឹងឃើញពីការឡើងថ្លៃស៊ីម៉ងត៍ ៥០ ០០០ ដុង (១,៩៧ ដុល្លារ) តោន ខណៈក្រុមហ៊ុន The Vissai ដំឡើងថ្លៃប្រមាណ ៤៦ ៣០០ ដុង/តោន។

អ្នកតំណាងមកពីក្រុមហ៊ុន ThànhThắng Group បាននិយាយថា៖ «តម្លៃអគ្គិសនីបានកើនឡើង ៤,៨ ភាគរយ ខណៈការចំណាយលើអគ្គិសនី រួមចំណែកលើថ្លៃដើមផលិតកម្ម ១៤-១៥ ភាគរយ ដែលធ្វើឱ្យតម្លៃផលិតទាំងមូលខ្ពស់ជាងមុន។ ទោះបីជាក្រុមហ៊ុនបានប្រតិបត្តិវិធានការកាត់បន្ថយតម្លៃផ្សេងៗឱ្យមានប្រសិទ្ធភាពក៏ដោយ យើងមិនអាចទូទាត់ឱ្យស៊ីគ្នានឹងការកើនឡើងនៃការចំណាយទេ»។ អ្នកតំណាងបន្តថា ការដំឡើងថ្លៃ ៥០ ០០០ ដុង/តោន រំពឹងថានឹងជួយក្រុមហ៊ុនផលិតស៊ីម៉ងត៍ ឱ្យរក្សាបាននូវស្ថិរភាពប្រតិបត្តិការ និងធានាបាននូវគុណភាពផលិតផល។

ក្រៅតែពីការឡើងថ្លៃអគ្គិសនី ជម្លោះភូមិសាស្ត្រនយោបាយទូទាំងពិភពលោក បានបង្កឱ្យមានការប្រែប្រួលសំខាន់ៗក្នុងការចំណាយលើតម្លៃផលិតកម្ម រួមទាំងការចំណាយកាន់តែខ្ពស់លើធ្យូងថ្ម និងប្រេង។ បញ្ហានេះ រំពឹងថានឹងបន្តកើនឡើងដែលធ្វើឱ្យឧស្សាហកម្មស៊ីម៉ងត៍មិនអាចរក្សាកម្រិតតម្លៃដូចមុន។

យោងតាមសមាគមស៊ីម៉ងត៍ជាតិវៀតណាម (VNCA) ការឡើងថ្លៃតម្លៃគឺជៀសមិនរួចនោះទេ ខណៈស៊ីម៉ងត៍វៀតណាម ត្រូវបានលក់នៅខាងក្រោមថ្លៃដើមផលិតកម្មអស់រយៈពេលជាច្រើនឆ្នាំមកហើយ។ ក្រុមហ៊ុននឹងត្រដាបត្រដួសក្នុងប្រតិបត្តិការរបស់ខ្លួន ប្រសិនបើមិនដំឡើងថ្លៃឱ្យសមស្របនឹងការចំណាយ៕