ក្រុមហ៊ុនអាកាសចរណ៍ Vietnam Airlines ចាប់ផ្តើមហោះហើរត្រង់ ពីរាជធានីភ្នំពេញ-ហាណូយ ឡើងវិញនៅចុងសប្ដាហ៍នេះ

ក្រុមហ៊ុនអាកាសចរណ៍ Vietnam Airlines​ នឹងហោះហើរត្រង់​ពីរាជធានីភ្នំពេញ​ទៅ​ទីក្រុង​ហាណូយឡើងវិញនៅថ្ងៃទី ២៧ ខែតុលា ឆ្នាំ ២០២៤។

ពិធីសម្ពោធជើងហោះហើរត្រង់ រវាងទីក្រុងហាណូយ និងរាជធានីភ្នំពេញ បានប្រារព្ធធ្វើឡើងកាលពីថ្ងៃទី ១៣ ខែកក្កដា ឆ្នាំ ២០២៤ ខណៈក្រុមហ៊ុនអាកាសចរណ៍ បាន​ចុះហត្ថលេខា​លើកិច្ចព្រមព្រៀងសហប្រតិបត្តិការជាមួយដៃគូសំខាន់ៗ ក្នុងប្រទេសកម្ពុជា ដើម្បី​ជំរុញ​​ការ​អភិវឌ្ឍវិស័យអាកាសចរណ៍ និងទេសចរណ៍រវាងប្រទេសទាំងពីរ។

ជើងហោះហើរថ្មីនេះនឹងចាប់ផ្តើមបើកដំណើរការនៅថ្ងៃទី២៧ ខែតុលា ឆ្នាំ២០២៤ ដែល​មានជើងហោះហើរចំនួន ៤ជើង ក្នុងមួយសប្ដាហ៍ ដោយប្រើប្រាស់យន្តហោះ Airbus A321។

លោក ខៀវ ធី ប្រធាន​សមាគមន៍​មគ្គុទ្ទេសក៍​ទេសចរ​អង្គរ​ប្រាប់កម្ពុជាថ្មីនៅថ្ងៃទី ២៤ ខែតុលា ឆ្នាំ ២០២៤ នេះថា បច្ចុប្បន្ន ភ្ញៀវទេសចរមកលេងកម្ពុជាសឹងតែ ៨០ ភាគរយ ហោះមកពីប្រទេស​វៀតណាម ដោយសារតែវៀតណាមបានពង្រីកប្រព័ន្ធហោះហើរទៅច្រើនទ្វីប ជាមួយនឹង​តម្លៃធូរថ្លៃ ដឹកចូលប្រទេសរបស់ខ្លួន ហើយតភ្ជាប់មកស្រុកយើង ៣ ទៅ ៤ ថ្ងៃ បន្ថែមទៀត។

លោក ខៀវ ធី បន្ថែមថា៖ «សន្ទុះភ្ញៀវទេសចរនៅវៀតណាមកើនឡើងច្រើន ហើយគេអាច​មានឱកាសតភ្ជាប់ជើងមកលេងស្រុកយើង ១ សប្ដាហ៍ ៣ ថ្ងៃ ដែលនេះជាឱកាសល្អ​សម្រាប់​វិស័យ​ទេសចរណ៍ និងសេដ្ឋកិច្ច»។

យោងតាមក្រសួងទេសចរណ៍ កម្ពុជាទទួលបានជើងហោះហើរអន្តរជាតិចូលសរុបជាង ១ ម៉ឺន ៨ ពាន់ជើង (១៨ ៤១៧) នៅក្នុងរយៈពេល ៩ ខែ ឆ្នាំ ២០២៤ ក្នុងនោះ អាកាសយានដ្ឋាន​អន្តរ​ជាតិភ្នំពេញចំនួន ១៣ ៥១១ ជើង អាកាសយានដ្ឋានអន្តរជាតិសៀមរាបអង្គរចំនួន ៤ ៥២៨ ជើងនិង​អាកាសយានដ្ឋានអន្តរជាតិព្រះសីហនុចំនួន ៣៧៨ ជើង។

ចាប់ពីខែមករា ដល់ខែកញ្ញា ឆ្នាំ ២០២៤ កម្ពុជាទទួលបានភ្ញៀវអន្តរ​ជាតិសរុប​ចំនួន​ជាង​ ៤,៨០ លាននាក់ កើនឡើង ២២,២ ភាគរយ បើធៀបនឹង​រយៈ​ពេល​ដូចគ្នាក្នុងឆ្នាំ ២០២៣ ដែល​មានចំនួន ៣,៩២ លាននាក់។ នេះបើតាមក្រសួងទេសចរណ៍៕

អត្ថបទ៖ ឡេង ដេត