SERC៖ ទុនវិនិយោគចំនួន ៣៨៩ លានដុល្លារអាមេរិកត្រូវបានប្រមូលពីវិស័យមូលបត្រចាក់បញ្ចូលទៅក្នុងចរន្តសេដ្ឋកិច្ច​

​និយ័តករមូលបត្រកម្ពុជា (SERC) បានថ្លែង ក្រុមហ៊ុ​ហ៊ុនចំនួន ២៣ ដែលបានបោះផ្សាយលក់មូលបត្រ និងចុះបញ្ជីលក់មូលបត្រនៅផ្សារមូលបត្រកម្ពុជា (CSX) ដែលក្រុមហ៊ុនទាំង ២៣ នេះ បានប្រមូលសាច់ប្រាក់ ៣៨៩ លានដុល្លារអាមេរិក។

​លោក ស៊ូ សុជាតិថ្លែងក្នុងពិធីពិព័រណ៍ផ្សារភាគហ៊ុនកម្ពុជា «My First STOCK ប្រចាំឆ្នាំ២០២៤» នៅផ្សារទំនើប អ៊ីអន ភ្នំពេញ ថ្ងៃទី២៥ ខែតុលានេះ​ ថាក្នុងចំណោមក្រុមហ៊ុនទាំង ២៣ នេះ មានក្រុមហ៊ុនចំនួន ១១ បានបោះផ្សាយលក់មូលបត្រកម្មសិទ្ធិ និងក្រុមហ៊ុនចំនួន ១២ បានបោះផ្សាយលក់សញ្ញាបណ្ណ ដោយរួមបញ្ចូលទាំងសញ្ញា        បណ្ណបៃតង និងសញ្ញាបណ្ណចីរភាព។

លោកបានថ្លែងថា៖«​​​វិស័យមូលបត្រ គឺជាសរសៃឈាមសេដ្ឋកិច្ច ដែលមានសក្តានុពលខ្ពស់នៅក្នុងការជំរុញ ការអភិវឌ្ឍគ្រប់វិស័យ តាមរយៈការផ្តល់នូវប្រភពទុនរយៈពេលវែងសម្រាប់សហគ្រាសក្រុមហ៊ុន ដើម្បីពង្រីកអាជីវកម្មរបស់ខ្លួន»។ ​

​បើតាម SERC ក្នុងរយៈពេលជាងមួយទស្សវត្សរ៍មកនេះ SERC  បានផ្តល់អាជ្ញាបណ្ណ ការអនុញ្ញាត និងការទទួលស្គាល់ដល់ក្រុមហ៊ុនធ្វើអាជីវកម្ម និងផ្តល់សេវាក្នុងវិស័យមូលបត្រចំនួន ១៣១ ក្រុមហ៊ុន និងបានរៀបចំនិងអនុម័តនូវច្បាប់ បទប្បញ្ញត្តិ និងគោលការណ៍ណែនាំផ្សេងៗ ដើម្បីឱ្យទីផ្សារនេះមានសណ្តាប់ធ្នាប់គណនេយ្យភាព និងតម្លាភាព។

​លោកបានថ្លែងថា៖«សមិទ្ធផលទាំងនេះ ជាសមិទ្ធផលរបស់យើងទាំងអស់គ្នា ដូចនេះ ដើម្បីជំរុញទីផ្សាររបស់យើងឱ្យកាន់តែសកម្ម និងអាចប្រកួតប្រជែងជាមួយទីផ្សារផ្សេងទៀតក្នុងតំបន់ ខ្ញុំសូមឱ្យក្រុមហ៊ុនមូលបត្រ និងក្រុមហ៊ុនបោះផ្សាយដែលមានវត្តមាននាថ្ងៃនេះទាំងអស់ សូមចូលរួមយ៉ាងសកម្មនៅក្នុងការជំរុញការផ្សព្វផ្សាយអំពីទីផ្សារមូលបត្រកម្ពុជា ដើម្បីជំរុញនូវសកម្មភាពជួញដូរឱ្យកាន់តែសកម្ម និងទាក់ទាញក្រុមហ៊ុនឱ្យងាក មករកជម្រើសហិរញ្ញប្បទានតាមរយៈទីផ្សារមូលបត្រ»។

លោក ហុង​ សុហួរ ​អគ្គនាយកផ្សារមូលបត្រកម្ពុជា បានថ្លែងថាគិតត្រឹមបច្ចុប្បន្ន ផ្សារមូលបត្រកម្ពុជា​មានគណនីជួញដូរជាង ៥៧,០០០ គណនីហើយ និងរំពឹងថា ចំនួននេះនឹងកើនដល់ប្រហែល ៦១,០០០ គណនីត្រឹមចុងឆ្នាំនេះ ដោយកើនបាន​១៥,០០០ ​គណនីថ្មី ក្នុងឆ្នាំ ២០២៤នេះ។ រីឯទំហំជួញដូរជាមធ្យមប្រចាំថ្ងៃវិញ គឺមានប្រមាណជា ២០ម៉ឺនដុល្លារក្នុងមួយថ្ងៃ បើគិតពីដើមឆ្នាំ ២០២៤មក។

លោកថា៖«បើទោះបីជាទំហំជួញដូរនេះមិនទាន់ធំនៅឡើយ ក៏ប៉ុន្តែទីផ្សាររបស់យើងសកម្មជាងមុន ដោយចំនួនដាក់បញ្ជាចូលទីផ្សារមានការកើនឡើងខ្លាំងក្នុងឆ្នាំនេះ ដែលបានបញ្ជាក់ពីការកើនឡើងនូវការសាកល្បងទីផ្សាររបស់វិនិយោគិនថ្មីៗ ក៏ដូចជាការកើនឡើងនូវ​វិនិយោគិន​សកម្ម»។

«ខ្ញុំមានក្តីស្រមៃមួយថា ផ្សារមូលបត្ររបស់យើងនឹងមានអ្នកវិនិយោគដល់ ១លាននាក់, ការទិញលក់ប្រចាំថ្ងៃដល់ ១០០លានដុល្លារ, ម្ចាស់អាជីវកម្មអាចចូលផ្សារហ៊ុន និងកៀរគទុនបានដល់ ១០០០លានដុល្លារ ក្នុងមួយឆ្នាំ, អ្នកវិនិយោគសាធារណៈនឹងអាចមានភាគហ៊ុន ដែលមានតម្លៃសរុបដល់ ១លានដុល្លារ រាប់ពាន់រាប់ម៉ឺននាក់, ហើយអាជីវកម្ម ដែលមានតម្លៃរយលាន ពាន់លានដុល្លារ នឹងមានរាប់មិនអស់ នៅកម្ពុជា»។ នេះបើយោងតាមលោក ហុង សុហ៊ួរ៕

​