សេដ្ឋកិច្ច

កម្ពុជាមានផ្ទៃដីដាំដុះស្វាយចន្ទីជាផ្លូវការជាង ៥៨ ម៉ឺន ហិកតា

បានផុស

២៧ នាទី មុន

នៅ

ថ្ងៃសុក្រ ២៥ តុលា ២០២៤

ដោយ

កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺនហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្តត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា។ នេះបើយោងតាមអគ្គនាយកដ្ឋានកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្ម មានប្រសាសន៍នៅក្នុងពិធីប្រកាសដាក់ឱ្យប្រើប្រាស់ជាផ្លូវការ ឯកសារស្ដីពី តំបន់ដាំដុះដំណាំស្វាយចន្ទីនៅកម្ពុជា» នៅថ្ងៃទី ២៥ ខែតុលា ឆ្នាំ ២០២៤ នេះថា កម្ពុជាមានផ្ទៃដីសមស្របសម្រាប់ដាំដុះស្វាយចន្ទីប្រមាណ ១,២៤ លានហិកតា និងមានប្រភេទពូជចន្ទីដែលផ្ដល់ទិន្នផលខ្ពស់ និងទំហំគ្រាប់ធំ ដូចជាប្រភេទពូជ M23 ដែលសមស្របតាមតម្រូវការអន្តរជាតិ។

លោក ងិន ឆាយ បញ្ជាក់ថា ជាច្រើនឆ្នាំកន្លងមក ការវាយតម្លៃផ្ទៃដីដាំដុះស្វាយចន្ទីមានប្រភពផ្សេងៗគ្នា ដែលធ្វើឱ្យមានការប្រើប្រាស់ទិន្នន័យខុសៗគ្នា ដែលបង្អាក់ទៅដល់ការសម្រេចចិត្តផ្នែកគោលនយោបាយ និងយុទ្ធសាស្ត្រសម្រាប់ដំណាំស្វាយចន្ទី។

លោក ងិន ឆាយ បន្តថា ចាប់តាំងពីដើមឆ្នាំ ២០២១ ក្រុមការងារបច្ចេកទេសរបស់នាយកដ្ឋានគ្រប់គ្រងធនធានដីកសិកម្ម នៃអគ្គនាយកដ្ឋានកសិកម្ម បានសហការជាមួយជំនាញការជាតិ និងអន្តរជាតិ ក្នុងការកសាងសមត្ថភាពច្ចេកទេស លើកការប្រើប្រាស់បច្ចេកវិទ្យាម៉ាស៊ីនស្វ័យសិក្សា (ML) និងបញ្ញាសិប្បនិម្មិត (AI) ដោយប្រើម៉ូឌែល CNNs ដើម្បីផលិតផែនទីតំបន់ដាំស្វាយចន្ទីកម្ពុជា។

លោក ងិន ឆាយ អះអាងថា ផលិតផលផែនទីដោយប្រើបច្ចេកវិទ្យានេះ បានផ្ដល់អត្ថប្រយោជន៍ច្រើន ដូចជាការទទួលបានទិន្នន័យត្រឹមត្រូវសម្រាប់សេចក្ដីសម្រេចចិត្តផ្នែកគោលនយោបាយ ផ្នែកយុទ្ធសាស្ត្រ និងការវិភាគសក្ដានុពលផលិតកម្ម និងទីផ្សារ ព្រមទាំងជូយដល់ការវាយតម្លៃប្រសិទ្ធភាពកសិកម្ម លើសុខភាពដី។

ផ្ទៃដីដាំដុះស្វាយចន្ទីកម្ពុជាមានចំនួន ៥៨០ ១១៧ ហិកតា ដែលជាប់ចំណាត់ថ្នាក់លេខ ៣ បើធៀបជាមួយប្រទេសដាំដុះចន្ទីនៅលើពិភពលោក។

លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កន្លងមកយើងមានបញ្ហាច្រើនពីការកំណត់ផ្ទៃដីឱ្យបានច្បាស់លាស់ពីកសិកម្ម។ ការសិក្សាតាមរយៈផ្កាយរណបនេះ គឺមានភាពសុក្រឹតខ្ពស់ ស្របជាមួយគោលនយោបាយរបស់រាជរដ្ឋាភិបាល។

លោក អួន ស៊ីឡុត ប្រធានសមាគមស្វាយចន្ទីកម្ពុជាយល់ឃើញថា កន្លងមកអង្គការក្រៅរដ្ឋាភិបាលធ្វើការខុសគោលដៅ ដូច្នេះ ពេលមានផែនទីនេះ ទាំងដៃគូអភិវឌ្ឍន៍ និងក្រុមហ៊ុនដែលធ្វើការពាក់ព័ន្ធនឹងវិស័យស្វាយចន្ទី គាត់នឹងអាចមានគោលការណ៍ ឬប្ដូរយុទ្ធសាស្ត្រថ្មី អនុវត្តតាមគោលដៅ។

លោក អួន ស៊ីឡុត៖ «ពីមុនមកយើងអត់ដឹង យើងចេះតែថា ស្វាយចន្ទីរបស់យើងមានតិច ទិន្នផលក៏ទាប ប៉ុន្តែឥឡូវយើងរកឃើញជាក់ស្ដែងយើងមានទិន្នផលចន្ទី ដែលធ្វើឱ្យមានទំនុកចិត្តពីវិនិយោគិនជាតិ និងអន្តរជាតិ»។

យោងតាមសមាគមស្វាយចន្ទីកម្ពុជា នៅក្នុងរយៈពេល ៩ ខែ (មករា-កញ្ញា) ឆ្នាំ ២០២៤ កម្ពុជាផលិតបានស្វាយចន្ទី ៨៤ ម៉ឺនតោន ក្នុងនោះនាំចេញទៅវៀតណាមជាង ៧៩ ម៉ឺនតោន ស្មើនឹងទឹកប្រាក់ ១ ពាន់ ១០ លានដុល្លារ កើនឡើង ៣០%៕

អត្ថបទ៖ ឡេង ដេត