តម្លៃសំបុកត្រចៀកកាំបានធ្លាក់ចុះប្រមាណ ១៥%

លោក ​ស៊ុយ ​កុកធាន ​ប្រធាន​សមាគម​ត្រ​ចៀក​កាំខ្មែរបានឱ្យដឹងថា តម្លៃសំបុកត្រចៀកកាំ​បាន​ធ្លាក់​​ចុះ ប្រមាណ ១៥% ដោយសារតែការធ្លាក់ចុះនៃការប្រើប្រាស់នៅប្រទេសចិន។

អគ្គនាយកដ្ឋានគយចិនគ្រោងសម្រេចអនុញ្ញាតឱ្យកម្ពុជានាំចេញផលិតផលសំបុកត្រចៀកកាំទៅកាន់ទីផ្សាររបស់ខ្លួននៅចុងឆ្នាំ ២០២៥ ឆាប់ៗខាងមុខនេះ ដែលជាការបើកផ្លូវថ្មីមួយទៀត​សម្រាប់​​​ផលិតផលរបស់កម្ពុជា។

លោក ​ស៊ុយ ​កុកធានបញ្ជាក់ថា៖ «បច្ចុប្បន្នដោយសារតែសេដ្ឋកិច្ចមានការធ្លាក់ចុះ ការប្រើ​ប្រាស់​ក៏មានការប្រែប្រួលតិចតួចដែរ ដូច្នេះតម្លៃសំបុកត្រចៀកកាំ បានធ្លាក់ចុះ ១៥% បើប្រៀប​ធៀប​ប៉ុន្មាន​ខែមុន»។

តម្លៃបច្ចុប្បន្ន ៤០០ ទៅ ៤៥០ ដុល្លារ ក្នុងមួយគីឡូក្រាម សម្រាប់សំបុកមិនទាន់កែច្នៃ ប៉ុន្តែ​សំបុក​​ឆាកាប្រមាណ ៣០០ ដុល្លារ ក្នុងមួយគីឡូក្រាម ខណៈកែច្នៃហើយ ១ ២០០​ សម្រាប់​ទីផ្សារក្នុងស្រុក។

បើតាមលោក ស៊ុយ កុកធាន ផលិតកម្មសំបុកត្រចៀកកាំផលិតនៅកម្ពុជា ភាគច្រើនផលិត​នៅខេត្តជាប់​មាត់​សមុទ្រ ដូចជា ខេត្តកំពត ខេត្តកោះកុង ប៉ុន្តែសក្ដានុពល​សម្រាប់​​ការវិនិយោគបន្ត បច្ចុប្បន្ន បាន​ប្ដូរ​មក​ខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញ​បឹង​ទន្លេសាប ខេត្តស្ទឹងត្រែង និងព្រះ​វិហារ​វិញ ដោយសារខេត្តជាប់មាត់សមុទ្រ មានការសាង​សង់​ច្រើន​លើសលប់។ តាមការប៉ាន់ស្មាន កម្ពុជាមានសត្ថភាពផលិតសំបុកត្រចៀកកាំ ប្រមាណ ១០០ តោន ក្នុងមួយឆ្នាំ៕

អត្ថបទ៖ ឡេង ដេត