ព័ត៌មានអន្ដរជាតិ

ថៃកត់ត្រាពីកំណើននៃការនាំចេញកសិផល ជំរុញដោយកិច្ចព្រមព្រៀងពាណិជ្ជកម្មសេរី

បានផុស

២ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

នាយកដ្ឋានចរចាពាណិជ្ជកម្មអន្តរជាតិថៃ បានឱ្យដឹងថា ការនាំចេញកសិផលរបស់ប្រទេសថៃ បានកើនឡើង ៨ ភាគរយ ក្នុងរយៈពេល៨ខែដំបូងដើមឆ្នាំ ២០២៤ ដល់ប្រមាណ ១៩,៨២៦ ប៊ីលានដុល្លារ។ នេះបើតាមការចុះផ្សាយកាសែត The Nation កាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយិកានាយកដ្ឋាន លោកស្រី Chotima Iemsawasdikul បានថ្លែងថា ទឹកប្រាក់ចំនួន ១៣,៧៧៤ ប៊ីលានដុល្លារ ឬ ៦៩ ភាគរយ នៃការនាំចេញកសិផលសរុបរបស់ថៃ គឺទៅកាន់បណ្ដាប្រទេសដែលថៃមានកិច្ចព្រមព្រៀងពាណិជ្ជកម្មសេរីរួមជាមួយ។

ថៃនៅតែបន្តជាប្រទេសនាំចេញកសិផលកំពូលសម្រាប់អាស៊ាន និងជាប់ចំណាត់ថ្នាក់ទី៨នៅទូទាំងពិភពលោក។ ទីផ្សារនាំចេញសំខាន់ៗរបស់ថៃរួមមានចិន អាស៊ាន ជប៉ុន និងកូរ៉េខាងត្បូង។

លោកស្រី Chotima បាននិយាយថា ការនាំចេញកសិផលរបស់ប្រទេសថៃបន្តបង្ហាញពីនិន្នាការវិជ្ជមាន និងកំណើន ទោះបីជាមានការប្រកួតប្រជែងខ្ពស់ក្នុងពាណិជ្ជកម្មអន្តរជាតិ ដោយសារភាពមិនប្រាកដប្រជានៃភូមិសាស្ត្រនយោបាយ ដែលបណ្តាលឱ្យមានការប្រែប្រួលនៅក្នុងសេដ្ឋកិច្ចពិភពលោកក៏ដោយ។

មន្រ្តីថៃដដែលបានបន្តថា ទស្សនវិស័យអំណោយផលសម្រាប់ការនាំចេញកសិផលថៃ បានបង្កើនឱកាសសម្រាប់សហគ្រិនថៃក្នុងការពង្រីកការលក់ទៅកាន់ទីផ្សារអន្តរជាតិ ដោយប្រើប្រាស់កិច្ចព្រមព្រៀងពាណិជ្ជកម្មសេរី។ បច្ចុប្បន្ន ប្រទេសជាដៃគូពាណិជ្ជកម្មសេរី ចំនួន១៨ បានកាត់បន្ថយ ឬលុបចោលពន្ធគយលើផលិតផលកសិកម្មភាគច្រើនដែលនាំចេញពីប្រទេសថៃ៕