ព័ត៌មានអន្ដរជាតិ

វៀតណាមស្នើដំឡើងពន្ធលើបុគ្គលកាន់កាប់អចលនទ្រព្យច្រើនកន្លែង

បានផុស

២ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

សភាវៀតណាមបានស្នើឱ្យដាក់ចេញនូវគោលនយោបាយបន្ថែមពន្ធលើបុគ្គលដែលជាម្ចាស់អចលនទ្រព្យច្រើនកន្លែង ឬទុកវាឱ្យនៅទំនេរ។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសំណើរបស់គណៈកម្មាធិការត្រួតពិនិត្យនៃរដ្ឋសភាដែលត្រូវបានពិភាក្សាកាលពីថ្ងៃចន្ទ គោលនយោបាយបែបនេះនឹងជំរុញទីផ្សារអចលនទ្រព្យប្រកបដោយនិរន្តរភាព ខណៈទីផ្សារអចលនទ្រព្យវៀតណាម មានភាពខុសគ្នារវាងការផ្គត់ផ្គង់ និងតម្រូវការ អស់រយៈពេលជាច្រើនឆ្នាំមកហើយ។

VnExpress មិនបានផ្សាយថា អត្រាពន្ធដែលត្រូវដំឡើងនោះ មានប៉ុន្មាន ឬមានលក្ខណៈ និងក្នុងលក្ខខណ្ឌបែបណាខ្លះនោះទេ យ៉ាងណាថា រដ្ឋាភិបាលបាននឹងកំពុងពិភាក្សាអំពីការដាក់ពន្ធអចលនទ្រព្យបន្ថែមទៀតក្នុងរយៈពេល ១៥ ឆ្នាំចុងក្រោយនេះ ដើម្បីកាត់បន្ថយការទិញអចលនទ្រព្យដើម្បីជួញដូររកប្រាក់ចំណេញ (Speculation) ប៉ុន្តែមកទល់ពេលនេះ មិនទាន់មានការសម្រេចចិត្តណាមួយនៅឡើយទេ។

លទ្ធផលស្ទង់មតិរបស់ VnExpress ដែលធ្វើលើមនុស្ស ៣២ ០០០ នាក់ បានបង្ហាញថា អ្នកឆ្លើយតប ៧០ ភាគរយ បានគាំទ្រលើការបន្ថែមពន្ធអចលនទ្រព្យលើបុគ្គលដែលកាន់កាប់លើសពី១កន្លែង និងដែលមានអចលនទ្រព្យទំនេរទុកចោល។

សូម្បីតែក្រសួងហិរញ្ញវត្ថុវៀតណាម ក៏បានធ្វើការអំពាវនាវដូចគ្នាផងដែរនាពេលកន្លងមក ដើម្បីទប់ទល់នឹង Speculation ក្នុងវិស័យអចលនទ្រព្យ ខណៈអះអាងថា ក្រសួងនឹងពិចារណា និងស្រាវជ្រាវគោលនយោបាយ ដើម្បីកែលម្អតម្លាភាពនៃទីផ្សារអចលនទ្រព្យវៀតណាម៕