ចំណូលពន្ធដារសឹងតែ ១០០% ប្រមូលតាមប្រព័ន្ធអេឡិចត្រូនិក

លោក គង់ វិបុល រដ្ឋមន្រ្តីប្រតិភូអមនាយករដ្ឋមន្រ្តី និងជាប្រតិភូរាជរដ្ឋាភិបាល ទទួលបន្ទុកជា​អគ្គនា​យក នៃអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ចំណូល​ពន្ធដារសឹងតែ ១០០% ប្រមូលតាមប្រព័ន្ធអេឡិចត្រូនិក។

លោក គង់ វិបុល បានថ្លែងថា អគ្គនាយកដ្ឋានពន្ធដារ បានដើរតួនាទីសំខាន់ក្នុងការប្រមូល​ចំណូលផ្ទៃក្នុងនៅកម្ពុជា ដែលស្ថិតនៅលំដាប់ទី១ ខណៈចំណូលគយទី២ ក្រៅពី​នេះគឺ​ចំណូល​មិន​មែនសារពើពន្ធ និងចំណូលផ្សេងទៀត។

បើតាមលោក គង់ វិបុល ចំណូលពន្ធដារបានដើរតួនាទីសំខាន់នៅរយៈពេលជាង ១០ ឆ្នាំ កន្លងមក អគ្គនាយកដ្ឋានពន្ធដារបានកែទម្រង់ជាច្រើន ជាពិសេស​នៅក្នុងការធ្វើទំ​នើបកម្ម ប្រព័ន្ធបច្ចេកវិទ្យាព័ត៌មាន ដែលផ្ដល់ភាពងាយស្រួលដល់អ្នកជាប់ពន្ធ ដោយតម្លាភាព និងប្រសិទ្ធភាព។

លោក គង់ វិបុល បញ្ជក់ថា៖ «នៅក្នុងការធ្វើទំនើបបកម្ម ប្រព័ន្ធបច្ចេកវិទ្យាព័ត៌មាន កន្លងទៅ​យើងមានប្រព័ន្ធគ្រប់គ្រង នៃការប្រមូលចំណូលពន្ធចំនួន ៧៩ កម្មវិធី និង Apps ដូច្នេះចំណូល​ពន្ធដារ គឺថា ជិត ១០០% ដែលយើងប្រមូលតាមប្រព័ន្ធអេឡិកត្រូនិក តាមប្រព័ន្ធ បច្ចេកវិទ្យា​ព័ត៌មាន»។

បើតាមលោក គង់ វិបុល នៅអំឡុងឆ្នាំ ២០១៣ និងឆ្នាំ ២០១៤ អគ្គនាយកដ្ឋានពន្ធដារ បានចាប់​ផ្ដើមពង្រឹងការចុះបញ្ជីតាមប្រព័ន្ធអនឡាញ និងមានប្រព័ន្ធគ្រប់គ្រងការប្រមូល​ចំណូលពន្ធ ហើយ​ក្រៅ​ពីការចុះបញ្ជី អគ្គនាយកដ្ឋានពន្ធដារបានដាក់ឱ្យប្រើកម្មវិធីមួយហៅថា ប្រព័ន្ធដាក់លិខិត​ប្រកាសពន្ធ និងឱ្យបង់ពន្ធតាមរយៈអនឡាញ E-Filing។

លោក គង់ វិបុល ប្រាប់ថា អ្នកជាប់ពន្ធអាចដាក់លិខិតប្រកាសព័ន្ធប្រចាំខែបាន ហើយមួយទៀត E-Filing TOI ប្រចាំឆ្នាំបាន និងប្រព័ន្ធ E-payment អគ្គនាយកដ្ឋានពន្ធដារក៏​បានអភិវឌ្ឍ​តាំង​ពី​ឆ្នាំ ២០១៤ ដំណើរការនៃការធ្វើទំនើបកម្ម ផ្នែកបច្ចេកវិទ្យាព័ត៌មាន នៅក្នុងវិស័យពន្ធដារ គឺ​បាន​ដើរទៅមុខ ស្ទើរតែឈានមុខគេ នៅក្នុងធ្វើទំនើបកម្ម ប្រព័ន្ធបច្ចេក​វិទ្យាព័ត៌មាន។

នៅក្នុងឆមាសទី០១ ឆ្នាំ ២០២៤ អគ្គនាយកដ្ឋានពន្ធដារបានប្រមូលចំណូលពន្ធអាករ​គ្រប់ប្រភេទចំនួនជិត ២ ពាន់លានដុល្លារ (១៩១៧,៩៦)​មានការធ្លាក់ចុះបន្តិច​បើធៀបនឹង​រយៈពេលដូចគ្នាកាលពីឆ្នាំមុន ដែលមានចំនួន  ២ ០៧២,៣៩​លានដុល្លារ។

នៅឆ្នាំ២០២៣ អគ្គនាយកដ្ឋានពន្ធដារ ប្រមូលចំណូលពន្ធបានប្រមាណជាង ៣ ពាន់លានដុល្លារ (៣ ៦១២.១២) កើន ៤.៤៩%៕

អត្ថបទ៖ ឡេង ដេត