កសិករជឿជាក់ថា តម្លៃគ្រាប់ស្វាយចន្ទីនឹងល្អប្រសើរនៅឆ្នាំ ២០២៥

លោក អួន ស៊ីឡុត ប្រធានសមាគមស្វាយចន្ទីកម្ពុជាបានលើកឡើងថា តម្លៃស្វាយចន្ទី​នៅ​កម្ពុជា នឹងមាន​ភាព​ល្អប្រសើរនៅឆ្នាំ ២០២៥ ខាងមុខនេះ ខណៈរូបលោកអំពាវ​នាវឱ្យកសិករដាំស្វាយចន្ទី​ពិនិត្យ​ទៅលើគុណភាពគ្រាប់។ បច្ចុប្បន្នតម្លៃគ្រាប់ស្ងួតលក់បាន ៦០០០ រៀលក្នុងមួយគីឡូក្រាម។

លោក អួន ស៊ីឡុត បញ្ជាក់ថា៖ «ខ្ញុំសង្ឃឹមថា ស្វាយចន្ទីនៅឆ្នាំ ២០២៥ នឹងមានតម្លៃល្អ ប៉ុន្តែទន្ទឹមនឹងការទទួលបានតម្លៃល្អនេះ ខ្ញុំសូមឱ្យកសិករត្រូវពិនិត្យគុណភាពស្វាយចន្ទីរបស់ខ្លួន បើចង់បានតម្លៃល្អ ព្រោះនៅថ្ងៃទី ០៣ ខែវិច្ឆិកានេះ សមាគមស្វាយចន្ទី បានណាត់អ្នកទិញ​ទាំងអស់មក​ជួបជុំគ្នា ដើម្បីចរចារជាមួយសហគមន៍ កសិកម្ម និងកសិករ បើត្រូវលក្ខខណ្ឌ​ហើយ យើងនឹងចុះកិច្ចសន្យាទិញ-លក់»។

លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ទំហំផ្ទៃដីដាំដុះស្វាយចន្ទីមានទំនោរកើនឡើង ដោយសារកសិករមើលឃើញអំពីការយកចិត្តទុកដាក់របស់រាជរដ្ឋាភិបាល ជំរុញការកែច្នៃ និងនាំចេញគ្រាប់ស្វាយចន្ទី។

លោក តូច ប៊ុនហួរ បានលើកឡើងថា ប្រសិនបើទីផ្សារល្អ ហើយពុំមានឧបសគ្គអ្វីកើតឡើង កម្ពុជានឹងក្លាយទៅជាអធិរាជស្វាយចន្ទីនៅក្នុងរយៈពេល ៥ ឆ្នាំខាងមុខ។

យោងតាមសមាគមស្វាយចន្ទីកម្ពុជា គិតត្រឹមរយៈពេល ៩ ខែ (មករា-កញ្ញា) ឆ្នាំ ២០២៤ កម្ពុជាផលិតគ្រាប់ស្វាយចន្ទីចំនួន ៨៤ ម៉ឺនតោន កើន ២៦% ក្នុងនោះនាំចេញទៅវៀតណាម​បានជាង ៧៩ ម៉ឺនតោន គិតជាទឹកប្រាក់ចំនួន ១ ពាន់ ១០ លានដុល្លារ កើន ៣៦% ខណៈ​តម្លៃកើន ៩% បើធៀបរយៈពេលដូចគ្នានៅឆ្នាំ ២០២៣។

ទិន្នន័យរបស់សមាគមស្វាយចន្ទីកម្ពុជា បង្ហាញថា នៅក្នុងឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន គិតជាទឹកប្រាក់ចំនួន ៨៣៧ លានដុល្លារ។

យោងតាមអគ្គនាយកដ្ឋានកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត