ព័ត៌មានអន្ដរជាតិ

សន្ទស្សន៍ផលិតកម្មថៃធ្លាក់ចុះនៅខែកញ្ញា ជំរុញដោយកម្សោយនៃផលិតកម្មរថយន្ត

បានផុស

២ ខែ មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

សន្ទស្សន៍ផលិតកម្មរោងចក្រថៃ (MPI) បានធ្លាក់ចុះ ៣,៥ ភាគរយ ក្នុងអត្រាប្រចាំឆ្នាំ មកនៅត្រឹម ៩២,៤ ពិន្ទុ នៅខែកញ្ញា ដោយសារតែការធ្លាក់ចុះនៃឧស្សាហកម្មរថយន្ត និងសំណង់ ខណៈលទ្ធផលនៃការបោះឆ្នោតប្រធានាធិបតីអាមេរិក អាចបង្កបញ្ហាប្រឈមថ្មីក្នុងត្រីមាសចុងក្រោយឆ្នាំនេះ។ នេះបើតាមការចុះផ្សាយរបស់កាសែតបាងកកប៉ុស្តិ៍ ដែលស្រង់ទិន្នន័យរបស់ការិយាល័យសេដ្ឋកិច្ចឧស្សាហកម្មថៃ (OIE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្លាក់ចុះនៅខែកញ្ញា ធ្វើឱ្យ MPI ប្រចាំត្រីមាសទី៣ ធ្លាក់ចុះ ១,២ ភាគរយ ក្នុងអត្រាប្រចាំឆ្នាំ មកនៅត្រឹម ៩៤,៧ ពិន្ទុ។

ប្រធានស្តីទីរបស់ OIE លោក Passakorn Chairat បានសន្មតថា ការថយចុះនៃMPI ប្រចាំខែកញ្ញា បណ្ដាលមកពីការធ្លាក់ចុះនៃសេដ្ឋកិច្ចក្នុងស្រុក កម្សោយនៃអំណាចទិញរបស់ប្រជាជន និងបំណុលគ្រួសារខ្ពស់។

លោកបានបន្តថា៖ «ការផលិតរថយន្តក្នុងប្រទេស បានបន្តធ្លាក់ចុះរយៈពេល ១៤ ខែជាប់ៗគ្នា»។ ហេតុផលចម្បងមួយនៅពីក្រោយបញ្ហានេះ គឺការរឹតត្បឹតរបស់ធនាគារថៃលើការផ្ដល់ប្រាក់កម្ចីទិញរថយន្ត ដោយសារតែក្ដីបារម្ភពីកម្ចីមិនដំណើរការ។

ជាមួយគ្នានេះ ការផលិតស៊ីម៉ងត៍ និងគ្រឿងសំណង់ស្រដៀងគ្នា បានថយចុះ ៨,៩ ភាគរយ នៅខែកញ្ញា ដោយសារតែការធ្លាក់ចុះនៃគម្រោងសំណង់សាធារណៈ និងឯកជន ចំពេលមានកម្រិតបំណុលគ្រួសារខ្ពស់ ខណៈតម្លៃសម្ភារសំណង់ និងអគារលំនៅឋាន ក៏បានកើនឡើងផងដែរក្នុងខែកញ្ញា៕