កម្ពុជា រកចំណូលបានជិត $៣៦  លាន ពីការលក់សំបុត្រចូលអង្គរ

គិតត្រឹមរយៈពេល ១០ ខែ ឆ្នាំ ២០២៤ មានភ្ញៀវទេសចរបរទេសចំនួនជាង ៧៧ ម៉ឺននាក់ បានទិញសំបុត្រ​ចូលទស្សនារមណី​យដ្ឋាន​អង្គរគិតជាទឹក​ប្រាក់​​​ប្រមាណជិត ៣៦ លានដុល្លារ កើនឡើង ២៩,០៧ % ប្រៀបធៀបរយៈពេលដូចគ្នានៅឆ្នាំ ២០២៣។

យោង​តាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០១ ខែវិច្ឆិកា ឆ្នាំ ២០២៤ ​បង្ហាញ​​ថា គិតចាប់ពីខែមករា-តុលា ​មានភ្ញៀវទេសចរបរទេសចំនួន ៧៧៤ ២០៣ នាក់ បាន​ទិញ​សំ​​បុត្រ​ចូល​ទស្សនា​រមណីយដ្ឋាន​អង្គរកើនឡើង ២៩,០៧ % ខណៈប្រាក់ចំណូល​ទទួល​បាន​ពី​ការ​លក់សំបុត្រចំនួន ៣៥ ៩៨៧ ៩៦១ ដុល្លារ កើនឡើង ២៩,០៧ % ប្រៀបធៀបរយៈពេលដូចគ្នានៅឆ្នាំ ២០២៣។

លោក ធួន ស៊ីណាន ​ប្រធាន​សមា​គម​ទេសច​រណ៍​អាស៊ី​ប៉ាស៊ីហ្វិក​កម្ពុជា (PATACC) ប្រាប់កម្ពុជាថ្មី ថា តួលេខទេសចរណ៍កម្ពុជាកើនឡើង ប៉ុន្តែស្ថានភាពជាក់ស្ដែងនៅតែមានឧបសគ្គ ដែលត្រូវការប្រឹងប្រែងបន្ថែមទៀត។ លោកថា ឧបសគ្គមានច្រើន ខណៈលោកឃើញសញ្ញវិជ្ជមានច្រើនដែល​អ្នកពាក់ព័ន្ធទាំងអស់ត្រូវចូលរួមទាំងអស់គ្នា។

លោក ខៀវ ធី ប្រធាន​សមាគមន៍​មគ្គុទ្ទេសក៍​ទេសចរ​អង្គរ​ប្រាប់កម្ពុជាថ្មី ថា វិស័យទេសចរណ៍ជាមាសបៃតង បើមានភ្ញៀវទេសចរកាន់តែច្រើន គឺអាចបង្កើតការងារឱ្យមនុស្សទូទៅ មិនចំពោះតែប្រតិបត្តិករទេសចរណ៍ទេ អ្នកប្រកបរបរកសិកម្មក៏ទទួលផលដែរ ដែលលោកអះអាងថា ជាវិស័យសំខាន់បម្រើការងារច្រើនដល់ប្រទេសជាតិ។

លោក ខៀវ ធី បានឱ្យដឹងថា ក្នុងខែវិច្ឆិកា កំណើនភ្ញៀវទេសចរអន្តរជាតិមកលេងច្រើននៅខេត្តសៀមរាប ដោយមានការកក់បន្ទប់សណ្ឋាគារ ផ្ទះសំណាក់ពេញអស់ហើយ។

យោងតាមក្រសួងទេសចរណ៍ នៅក្នុងរយៈពេល ៩ ខែ ឆ្នាំ ២០២៤ (មករា-កញ្ញា) កម្ពុជា ទទួលបានភ្ញៀវអន្តរ​ជាតិសរុប​ចំនួន​ជាង​ ៤,៨០ លាននាក់ កើនឡើង ២២,២ ភាគរយ បើធៀបនឹង​រយៈ​ពេល​ដូចគ្នាក្នុងឆ្នាំ ២០២៣ ដែលមានចំនួន ៣,៩២ លាននាក់៕

អត្ថបទ ៖ ឡេង ដេត