គ្រាប់ស្វាយចន្ទីកែច្នៃ ១៦ តោន ក្នុងចំណោមការបញ្ជាទិញ ២០០ តោន ចាប់ផ្ដើមនាំចេញ​ទៅទីផ្សារអឺរ៉ុប

ក្រុមហ៊ុន Mirarth Agri Tech នៅសប្ដាហ៍នេះ បាននាំចេញគ្រាប់ស្វាយចន្ទីកែច្នៃចំនួន ១៦ តោន ក្នុងចំណោម​ការបញ្ជារទិញ ២០០ តោន ទៅ​កាន់ទីផ្សារអឺរ៉ុប ដែលជាការបញ្ជារ​ទិញក្នុង​ទំហំច្រើន​មិនធ្លាប់​មានទៅកាន់ទីផ្សារអឺរ៉ុប។ នេះបើតាមសមាគមស្វាយចន្ទីកម្ពុជា។

លោក អួន ស៊ីឡុត ប្រធានសមាគមស្វាយចន្ទីកម្ពុជា ការនាំចេញគ្រាប់ស្វាយចន្ទីកែច្នៃមានចំនួនតិចតួចសម្រាប់​ទីផ្សារអឺរ៉ុប នៅអឺរ៉ុបស្ដង់ដាខ្ពស់ ដូច្នេះបើទំនិញកម្ពុជាអាចនាំចូល​ទៅទីផ្សារ​អឺរ៉ុបបាន មានន័យថា យើងមានស្ដង់ដា សុវត្ថិភាពចំណីអាហារស្ដង់ដាខ្ពស់ហើយ ទទួលស្គាល់​ដោយ​អន្តរជាតិ។

លោក អួន ស៊ីឡុត បញ្ជាក់ថា កម្ពុជាត្រូវពង្រឹងសមត្ថភាពសហគ្រាសក្នុងស្រុក និងផ្ដល់​ទុន​បង្វិលឱ្យបានគ្រប់គ្រាន់ និងបន្ថយថ្លៃដើមផលិតជូនពួកគាត់ ដើម្បីឱ្យទំនិញ​របស់យើង​អាច​ប្រកួតប្រជែង​​នៅលើទីផ្សារអន្តរជាតិ មក​ដល់​ពេលនេះ ទំនិញគ្រាប់ស្វាយចន្ទី​កែច្នៃហើយ គឺមានតម្លៃថ្លៃបើប្រៀបធៀបជាមួយបណ្ដាប្រទេសជិតខាង យើងពិបាកក្នុងការ​ប្រជែង​​នៅ​លើទីផ្សារអន្តរជាតិ។

យោងតាមសមាគមស្វាយចន្ទីកម្ពុជា គិតត្រឹមរយៈពេល ៩ ខែ (មករា-កញ្ញា) ឆ្នាំ ២០២៤ កម្ពុជាផលិតគ្រាប់ស្វាយចន្ទីចំនួន ៨៤ ម៉ឺនតោន កើន ២៦% ក្នុងនោះនាំចេញទៅវៀតណាម​បានជាង ៧៩ ម៉ឺនតោន គិតជាទឹកប្រាក់ចំនួន ១ ពាន់ ១០ លានដុល្លារ កើន ៣៦% ខណៈ​តម្លៃកើន ៩% បើធៀបរយៈពេលដូចគ្នានៅឆ្នាំ ២០២៣។ យោងតាមអគ្គនាយកដ្ឋានកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា៕