ព័ត៌មានអន្ដរជាតិ

តម្លៃប្រេងឡើងពេលបញ្ចប់ការជួញដូរ ប៉ុន្តែធ្លាក់ចុះក្នុងអត្រាប្រចាំសប្ដាហ៍

បានផុស

៣ ខែ មុន

នៅ

ថ្ងៃសៅរ៍ ២ វិច្ឆិកា ២០២៤

ដោយ

តម្លៃប្រេងឆៅសកលបានកើនឡើងតិចតួច នៅពេលបញ្ចប់ការជួញដូរកាលពីថ្ងៃសុក្រ ជុំវិញសេចក្ដីរាយការណ៍ថា អ៊ីរ៉ង់ត្រៀមវាយប្រហារអ៊ីស្រាអែលជាថ្មី ខណៈអត្រាប្រចាំសប្ដាហ៍បានបន្តធ្លាក់ចុះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ២៩ សេន ឬ ០,៤ ភាគរយ ដោយបញ្ជប់ការជួញដូរនៅតម្លៃ ៧៣,១០ ដុល្លារ/បារ៉ែល។ ចំណែកឯតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) វិញ បានកើនឡើង ២៣ សេន ឬ ០,៣ ភាគរយ ដោយជួញដូរនៅ ៦៩,៤៩ ដុល្លារ/បារ៉ែល។

បើគិតក្នុងអត្រាតម្លៃប្រចាំសប្ដាហ៍ ប្រេងម៉ាក Brent បានធ្លាក់ចុះប្រហែល ៤ ភាគរយ ខណៈម៉ាក WTI បានធ្លាក់ចុះប្រហែល ៣ ភាគរយ។

ការឡើងថ្លៃតិចតួចនេះ កើតឡើងនៅពេលមានសេចក្ដីរាយការណ៍ថា អ៊ីរ៉ង់ត្រៀមវាយប្រហារសងសឹកអ៊ីស្រាអែលចេញពីប្រទេសអ៊ីរ៉ាក់ ក្នុងរយៈពេលប៉ុន្មានថ្ងៃខាងមុខ ខណៈសត្រូវទាំង២វាយប្រហារគ្នាទៅវិញទៅមកក្នុងបរិបទជម្លោះមជ្ឈិមបូព៌ានៅហ្គាហ្សា។

យ៉ាងណាមិញ កំណើនតម្លៃប្រេងមានកម្រិតដោយសារតែរបាយការណ៍ពីទិន្នផលប្រេងនៅអាមេរិកកើនឡើង ដល់ប្រមាណ ១៣,៤ លានបារ៉ែល/ថ្ងៃ។

ទោះបីបែបនេះក្ដី អ្នកវិនិយោគនៅតែចាំមើលលទ្ធផលនៃការបោះឆ្នោតនៅអាមេរិក ដែលអាចនឹងបង្កភាពស្រពិចស្រពិលច្រើនសម្រាប់ទីផ្សារជួញដូរ៕