ស្ពានខ្ពស់ជាងគេនៅកម្ពុជា សម្រេចការសាងសង់ជិត ៨០% គ្រោងបើកឱ្យប្រើប្រាស់នៅខែមីនា ឆ្នាំ ២០២៥

ស្ពានលេខ២៨ នៃគម្រោងស្ថាបនាផ្លូវជាតិលេខ១០ គឺជាស្ពានខ្ពស់ជាងគេនៅកម្ពុជា ដែលមានកម្ពស់៩០ម៉ែត្រ ប្រវែងសរុប ៥៣៧ម៉ែត្រ សម្រេចការសាងសង់បាន ៧៩%ហើយ ហើយនឹងដាក់ឱ្យប្រើប្រាស់សាកល្បងនៅចុងខែមីនា ឆ្នាំ២០២៥ ខាងមុខនេះ មុនពិធីបុណ្យចូលឆ្នាំថ្មី ប្រពៃណីជាតិខ្មែរ។

លោក ផន រឹម មន្រ្តីអ្នកនាំពាក្យ​ក្រសួងសាធារណការ ​និងដឹកជញ្ជូនបាន​ឲ្យ​ដឹង​ថា ការងារសាងសង់​ស្ពាន​ឆ្លង​កាត់ស្ទឹងឫស្សីជ្រុំ ដែលមាន​ប្រវែង ៥៣០ ម៉ែត្រ សម្រេចបាន ៧៩% ហើយ​គ្រោងដាក់ឱ្យប្រើប្រាស់សាកល្បង​នៅចុងខែមីនា ឆ្នាំ​២០២៥​ ខាងមុខ។

ស្ពានខ្ពស់ជាងគេនេះ មានចំណុចកណ្តាលស្ពានស្ថិតនៅត្រង់គីឡូម៉ែត្រលេខ ១២៨+៩០៥ ហើយកាត់តាមជ្រលងស្ទឹងឫស្សីជ្រុំ មានមុំប្រសព្វ ៩០ដឺក្រេ។ សំណង់ផ្នែកខាងលើមានធ្នឹមប្រភេទអក្សរ “T” ផ្នែកខាងកើតមាន៤ប្រឡោះ ផ្នែកកណ្តាលជាប្រភេទធ្នឹមប្រអប់ខ្សែកាបទាញមាន៣ប្រឡោះ និងផ្នែកខាងលិចប្រភេទធ្នឹមអក្សរ “T” មាន៥ប្រឡោះ។

ចំណែកឯសំណង់ផ្នែកខាងក្រោមមានទម្រក្បាលស្ពាន និងធ្នឹមទទឹង (សម្រាប់ទ្រធ្នឹមប្រភេទអក្សរ “T”) ប្រើសសរមូលជួរឈរ និងប្រភេទគ្រឹះខួង ព្រមទាំងធ្នឹមទទឹងប្រើសសរបែបជញ្ជាំងជួរឈរ និងប្រភេទគ្រឹះខួង។

សូមជំរាបថា ផ្លូវជាតិលេខ ១០ ស្ថាបនា​ឡើង​ជាប្រភេទផ្លូវកម្រិត​ Grade III ក្រាលកៅស៊ូពីរស្រទាប់ (DBST) មានប្រវែងផ្លូវសរុប ១៩៨,៥១៨ ​គីឡូម៉ែត្រ និងទទឹង ៩ម៉ែត្រ។

គម្រោងសាងសង់មានរយៈពេល ៦៦ខែ និងបានចាប់ផ្ដើមសាងសង់ពីថ្ងៃទី​១៨ ខែធ្នូ ឆ្នាំ​២០១៩ ហើយគ្រោងនឹងបញ្ចប់នាខែមិថុនា ឆ្នាំ២០២៥ ខាងមុខនេះ៕