ព័ត៌មានអន្ដរជាតិ

ផែនការពន្ធរបស់ ត្រាំ អាចបន្ថែមការចំណាយប្រចាំឆ្នាំរបស់ពលរដ្ឋអាមេរិក ជិត ៨០ ប៊ីលាន

បានផុស

៨ នាទី មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

សហព័ន្ធលក់រាយជាតិអាមេរិក (NRF) បានចេញរបាយការណ៍នៃការសិក្សាថ្មីកាលពីថ្ងៃចន្ទ ដែលបង្ហាញថា ពលរដ្ឋអាមេរិកអាចនឹងបន្ថែមការចំណាយប្រចាំឆ្នាំរហូតដល់ ៧៨ ប៊ីលានដុល្លារ ប្រសិនបើលោក ដូណាល់ ត្រាំ អនុវត្តវិធានការពន្ធរបស់លោក ក្រោយលទ្ធភាពនៃការឈ្នះឆ្នោតនាថ្ងៃទី ៥ វិច្ឆិកា នេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសិក្សានិយាយថា ពន្ធដែលលោក ត្រាំ ស្នើឡើង នឹងប៉ះពាល់ដល់ប្រភេទផលិតផលប្រើប្រាស់ផ្សេងៗដូចជាសម្លៀកបំពាក់ ប្រដាប់ក្មេងលេង គ្រឿងសង្ហារឹម សម្ភារៈប្រើប្រាស់ ស្បែកជើង និងទំនិញធ្វើដំណើរ ជាពិសេសប៉ះពាល់ដល់ទំនិញដែលប្រទេសចិនជាអ្នកផ្គត់ផ្គង់ធំ។

អនុប្រធាន NRF ទទួលបន្ទុកខ្សែសង្វាក់ផ្គត់ផ្គង់ និងគោលនយោបាយគយ លោក Jonathan Gold បាននិយាយថា៖ «អ្នកលក់រាយពឹងផ្អែកយ៉ាងខ្លាំងលើផលិតផលនាំចូល និងសមាសធាតុផលិត ដោយពួកគេអាចផ្តល់ជូនអតិថិជនរបស់ពួកគេនូវផលិតផលជាច្រើនប្រភេទក្នុងតម្លៃសមរម្យ»។

យ៉ាងណាមិញ របាយការណ៍ NRF បាននិយាយថា ប្រសិនបើពន្ធនាំចូលត្រូវបានអនុវត្ត វានឹងធ្វើឱ្យប៉ះពាល់ដល់គ្រួសារដែលមានចំណូលទាបបន្ថែមទៀត តាមរយៈការដំឡើងតម្លៃទំនិញអ្នកប្រើប្រាស់ដែលនាំចូល កាន់តែខ្ពស់»។

គួរគូសបញ្ជាក់ថា លោក ត្រាំ បានបង្កើនគោលនយោបាយការពារនិយមរបស់លោក ដោយស្នើលើគោលនយោបាយបង្កើនពន្ធពី ១០-២០ ភាគរយ លើគ្រប់មុខទំនិញនាំចូលពីគ្រប់ប្រទេស និង ៦០-១០០ ភាគរយ លើទំនិញនាំចូលពីចិន។ ការនេះបង្កក្ដីបារម្ភពីសេដ្ឋវិទូថា គោលនយោបាយរបស់លោកនឹងបង្កើនអតិផរណា ខណៈមានលទ្ធភាពធ្វើឱ្យកំណើនសេដ្ឋកិច្ចសកលធ្លាក់ចុះ ដោយកាត់បន្ថយពាណិជ្ជកម្ម៕